रुपन्देही । नेपाली कांग्रेस र नेकपा एमालेबाट निर्वाचित जनप्रतिनिधि बीचको आन्तरिक सहमतिपछि रुपन्देहीको तिलोत्तमा नगरपालिकामा रोकिएको नगरसभा सुरु भएको छ ।

दुई पक्षबीचको विवादले यहाँको नगरसभा रोकिनुको साथै बजेट पनि पास हुन सकेको थिएन । आइतबारको नगरसभामा सहभागी जनप्रतिनिधिलाई अभद्र व्यवहार गर्ने प्रहरी तथा प्रमुख कार्यकारी अधिकृतमाथि छानविन गर्ने र अन्य विवादित विषयमा समन्वय गरेर जाने सहमति भएको हो ।

नगरप्रमुख रामकृष्ण खाँड र उपप्रमुख जागेश्वरी चौधरीबीच विवादित विषयमा सहमति भएपछि सभा सुरु भएको तिलोत्तमा नगरपालिकाले जनाएको छ।

कार्यपालिकामा बहुमत रहेको एमाले र नेतृत्वमा रहेका खाँडबीच निर्वाचित जनप्रतिनिधिबीच भएको असमझदारी हटाउने, न्यायिक समितिमा नेपाली काँग्रेसको तर्फबाट एक जना प्रतिनिधि राख्ने र नगरसभाको कार्यसूचीमा विषयगत समितिहरू गठन गर्ने विषय समावेश गर्ने सहमति भएको बताइएको छ।

यस्तै विवाद सिर्जना गराउने प्रमुख प्रशासकीय अधिकृत जीवन ज्ञवालीको स्थानमा अर्को प्रमुख प्रशासकीय अधिकृत ल्याउने र जनप्रतिनिधिमाथि हातपात गर्ने र पोखरीमा फाल्ने प्रहरी अधिकृतलाई कारबाही प्रक्रिया अगाडि बढाउने लगायतका सहमति भएको छ।

क्याटेगोरी : राजनीति, समाचार
ट्याग : #breaking, #तिलोत्तमा नगरपालिका

---

---

---