संखुवासभा कांग्रेस जिल्ला अधिवेशन तयारी समिति गठन

साझा पाना २०८३ भदौ २५ गते १२:०१ मा प्रकाशित

काठमाडौ । नेपाली कांग्रेसको १५औँ महाधिवेशन तयारी समितिका संयोजक डा. शशांक कोइरालाले संखुवासभा कांग्रेसको जिल्ला अधिवेशन तयारी समिति संयोजक र सह – संयोजक मनोनयन गर्नुभएको छ ।

डा. कोइरालाले जिल्ला उपसभापति रामकुमार जिमीलाई तयारी समिति संयोजक र महासमिति सदस्य उमेश चौहानलाई सह – संयोजक मनोनयन गर्नुभएको हो । जिमी तत्कालीन क्षेत्र नं. २ का क्षेत्रीय सभापति तथा चौहान तत्कालीन क्षेत्र नं. १ का क्षेत्रीय सभापति हुनुहुन्थ्यो ।

नेपाली कांग्रेसका केन्द्रीय सदस्य तथा संखुवासभाका लागि केन्द्रीय प्रतिनिधि पूर्वमन्त्री दीपक खड्काको प्रमुख आतिथ्यमा बसेको जिल्ला कार्यसमिति संखुवासभाको बैठकले जिमी र चौहानको नाम सर्वसम्मत रूपमा सिफारिस गरेको थियो । जिल्ला कार्यसमितिको सिफारिसका आधारमा केन्द्रीय प्रतिनिधि खड्काले गरेको सिफारिसमा डा. कोइरालाले उहाँहरूलाई मनोनयन गर्नुभएको हो ।

यसैबीच, केन्द्रीय प्रतिनिधि खड्काले नेपाल तरुण दल संखुवासभा जिल्ला संयोजकमा थमन गुरुङलाई मनोनयन गर्नुभएको छ ।

गत साउन २९, ३० र ३१ गते सम्पन्न राष्ट्रिय भेला तथा सम्मेलनको निर्देशनअनुसार भदौ १३ र १८ गते बसेको १५औँ महाधिवेशन तयारी समितिको बैठकले महाधिवेशनको कार्यतालिका स्वीकृत गरेको थियो ।

स्वीकृत कार्यतालिकाअनुसार असोज १५ गते वडा अधिवेशन, असोज २० गते पालिका अधिवेशन, असोज २५ गते प्रदेश सभा तथा प्रतिनिधिसभा क्षेत्रीय अधिवेशन, कात्तिक १५ गते जिल्ला अधिवेशन र मङ्सिर ४ गते प्रदेश अधिवेशन गर्ने निर्णय भएको छ । त्यस्तै, मङ्सिर २१, २२ र २३ गते काठमाडौंमा केन्द्रीय महाधिवेशन गर्ने कार्यतालिका तय गरिएको छ ।

नेपाली कांग्रेसको १५औँ महाधिवेशनको कार्यतालिका दुवै पक्षबाट सार्वजनिक भएपछि जिल्लादेखि वडा तहसम्म समानान्तर गतिविधि सुरु भएका छन् । पार्टीको केन्द्रीय कार्यसमितिको आधिकारिकतासम्बन्धी विवाद सर्वोच्च अदालतमा विचाराधीन रहेको अवस्थामा १४औँ महाधिवेशनबाट निर्वाचित वैधानिक केन्द्रीय कार्यसमितिले नै १५औँ महाधिवेशन सम्पन्न गराउनुपर्ने वैधानिक दायित्व रहेको दाबी दुवै पक्षको पत्राचारमा उल्लेख गरिएको छ ।