त्रिशुलीबाट काठमाडौं आउँदै गरेको इभी छहरे-टोखा खण्डमा दुर्घटना, नौ जना घाइते

साझा पाना २०८२ जेठ १२ गते २१:२७ मा प्रकाशित

जेठ ११ टोखा। त्रिशुलीबाट काठमाडौं आउँदै गरेको बागमती प्रदेश ०३-००१ ज ०८५४ नम्बरको इभी गाडी नुवाकोटको शिवपुरी गाउँपालिका–७, गुरुङगाउँस्थित टोखा–छहरे सडकखण्डमा आज दिउँसो ३ बजे दुर्घटनामा परेको छ। सडकबाट करिब १० मिटर तल खस्दा गाडीमा सवार ९ जना यात्रु घाइते भएका छन्।

जिल्ला प्रहरी कार्यालय नुवाकोटका अनुसार, गाडी आफैं अनियन्त्रित भएर सडकबाट तल खसेको हो। दुर्घटनामा घाइते भएका सबै जनालाई तत्कालै उपचारको लागि काठमाडौंस्थित ग्राण्डी अस्पताल पठाइएको छ।

घटनास्थलबाट इलाका प्रहरी पोस्ट गुर्जेभन्ज्याङबाट खटिएको प्रहरी टोलीले इभी गाडीका चालक शिवपुरी गाउँपालिका–७ का ३६ वर्षीय रवि बस्नेतलाई नियन्त्रणमा लिएको छ।

दुर्घटनामा घाइते हुनेहरुमा नुवाकोट लिखु गाउँपालिका–४ चौघडा बस्ने ३९ वर्षीया मैना राई, काठमाडौं महाराजगञ्ज बस्ने ४६ वर्षीया लक्ष्मी खड्की, काठमाडौं गोङ्गबु बस्ने ३५ वर्षीया श्रीजना लामा, नुवाकोट विदुर नगरपालिका–५ माझिटार बस्ने १८ वर्षीया बिपना अर्याल, नुवाकोट तलाखु बस्ने २८ वर्षीय रसमान लामा, नुवाकोट तलाखु बस्ने १८ वर्षीय बिजय लामा, काठमाडौं कलंकी बस्ने ३९ वर्षीया सरस्वती राई, काठमाडौं कलंकी बस्ने ३८ वर्षीय श्याम दगौरा र रसुवा उत्तरगया गाउँपालिका–५ बस्ने २५ वर्षीय महेन्द्र श्रेष्ठ रहेका छन्।

घाइतेहरुमध्ये मैना राई र लक्ष्मी खड्कीको अवस्था मध्यम रहेको र बाँकी सात जनाको अवस्था सामान्य रहेको प्रहरीले जनाएको छ। घटनाबारे थप अनुसन्धान भइरहेको जिल्ला प्रहरी कार्यालय नुवाकोटले जनाएको छ।

क्याटेगोरी : समाचार
ट्याग : #breaking, #त्रिशुलीबाट काठमाडौं आउँदै गरेको इभी छहरे-टोखा खण्डमा दुर्घटना, #नौ जना घाइते