पोखरा । वडाध्यक्षले प्रशासन शाखा प्रमुखमाथि हातपात गरेपछि पोखरा महानगरपालिकाका कर्मचारीले सेवा ठप्प पारेका छन् ।

वडा नम्बर ४ का अध्यक्ष देवकृष्ण पराजुलीले मंगलबार प्रमुख प्रशासकीय अधिकृतको कार्यकक्षमा प्रशासन महाशाखा प्रमुख ईश्वरीप्रसाद पोख्रेललाई हातपात गरेका हुन् ।

महानगरपालिकाका कर्मचारीलाई तालिममा पठाउँदा सल्लाह नगरेको भन्दै आफूमाथि हातपात गरेको प्रशासन शाखा प्रमुख पोख्रेलले बताए ।

 

प्रशासकीय अधिकृतको कार्यकक्षमा पुग्दा साथ वडाध्यक्षले अपशब्द बोल्दै हातपात गरेको उनको आरोप छ । वडाध्यक्षले उक्त समयमा मादक पदार्थसमेत सेवन गरेको पोख्रेलको दाबी छ ।

उक्त घटनाका विषयमा कर्मचारी सम्बद्ध ४ संगठनले मंगलबार मेयर र प्रमुख प्रशासकीय अधिकृतलाई २४ घन्टे अल्टिमेटमसहित ज्ञापनपत्र बुझाएका थिए ।

स्थानीय तह कर्मचारी युनियन, स्थानीय तह कर्मचारी संघ, नेपाल राष्ट्रिय कर्मचारी संगठन र एकिकृत सरकारी कर्मचारी संगठनले संयुक्त रुपमा ध्यानाकर्षण बुझाउँदै कर्मचारीमाथि हातपात गर्ने वडाध्यक्षलाई कारबाही गर्न माग गरेको हुन् । तर, २४ घन्टासम्म पनि कुनै सुनुवाई नभएको भन्दै कर्मचारीले महानगरको सेवा ठप्प पारेका हुन् ।

स्थानीय तह कर्मचारी संघका रेशम जिसीले कर्मचारीको सुरक्षाको ज्ञारेन्टीको माग गर्दै आन्दोलनको कार्यक्रम गरिएको बताए । उनले आज पनि सुनुवाई नभए थप आन्दोलन गरेर अगाडि बढ्ने चेतावनी दिए ।

महानगरका प्रमुख प्रशासकीय अधिकृत शिवराज चौलागाईंले बिहीबार बिहान दुवै पक्षको लागि छलफल बोलाइएको बताए । ‘दुवै पक्षको छलफलका लागि भोलि बिहान बैठक बोलाएका छौं । छलफलबाटै यो विषयको टुंगो लाग्छ,’ उनले संक्षिप्त प्रतिक्रिया दिए ।

क्याटेगोरी : समाचार
ट्याग : #breaking, #पोखरा महानगरको कामकाज ठप्प, #वडाध्यक्षले गरे कर्मचारीमाथि हातपात

---

---

---