नेपालले किङ्स कप सेपाक ताक्रो प्रतियोगितामा स्वर्ण पदक जित्यो, २३ वर्षपछि ऐतिहासिक उपलब्धि

नेपालले डिभिजन १ मा प्रतिस्पर्धा गर्दै उत्कृष्ट प्रदर्शन प्रस्तुत गरेको छ। विशेषगरी, ट्रियो विधामा नेपालले स्वर्ण पदक जित्न सफल भयो। यस विधामा दुई महिला र एक पुरुष खेलाडी मैदानमा खेल्छन्, र एक खेलाडी स्पेयरमा बस्छन्। नेपालका खेलाडीहरूको समन्वय र प्रयासले स्वर्ण पदक नेपालमा ल्याएको छ।

त्यस्तै, मिक्स्ड क्वाड विधामा नेपालले कांस्य पदक जित्न सफल भयो। यस विधामा दुई महिला र दुई पुरुष खेलाडीहरू मैदानमा खेल्छन्, जबकि दुई खेलाडीहरू स्पेयरमा बस्छन्। नेपालले यो विधामा पनि उत्कृष्ट प्रदर्शन गर्दै कांस्य पदक जित्न सफल भएको छ।

मेन क्वाड विधामा पनि नेपालले कांस्य पदक जित्न सफल भएको छ। यस विधामा चार पुरुष खेलाडी मैदानमा खेल्छन्, र दुई जना स्पेयरमा बस्छन्।

नेपालले हुप ताक्रो विधामा पनि कांस्य पदक जितेको छ। यस विधामा ६ जना खेलाडीको समूहले प्रतिस्पर्धा गर्छ।

प्रतियोगितामा नेपालको टिमलाई कोरात, थाइल्याण्डमा प्रतिनिधित्व गर्ने खेलाडीहरूमा प्रमुख भूमिका निभाएका थिए:

• अनिल जर्गा मगर
• रोशन तामाङ
• सुजन तामाङ
• पदम बहादुर ठाडा मगर
• दिपेश जंग थापा
• उमेश महत्तो
• सुमित्रा डङ्गोल
• चन्द्रा चौधरी

नेपालको टिमलाई प्रशिक्षकहरू महेन्द्र राई र श्यामबहादुर श्रेष्ठ थिए भने शोमाया थापा मगर रेफ्रीको रूपमा सहभागी थिए। टिम व्यवस्थापकको भूमिका जितेन्द्र थापा मगरले निभाएका थिए। कुल १३ जनाको नेपाली टोलीले यस प्रतियोगितामा सहभागिता जनाएको थियो।

सेपाक ताक्रोको अन्तर्राष्ट्रिय महासंघको अध्यक्ष नेत्रप्रसाद गुरुङको नेतृत्वमा नेपाली टोलिले यो सफलता हासिल गरेको हो। खेलाडीहरू विभिन्न प्रदेशहरू र नेपाली सेनाबाट छनोट भई सहभागी भएका थिए, जसमा विशेषगरी बागमती प्रदेशको टोखा नगरपालिकाबाट चारजना खेलाडी सहभागि भएका थिए।

टोखा नगरपालिका वडा नं ७ का वडा अध्यक्ष नरोत्तम राना मगरको महत्वपूर्ण सहयोगको कारण खेलाडीहरूलाई प्रेरणा प्राप्त भएको छ। नेपाली खेलाडीहरूले उनलाई धन्यवाद ज्ञापन गर्दै आगामी दिनमा थप खेलाडीहरूको विकास र प्रशिक्षणमा सहयोगको आशा व्यक्त गरेका छन्।

प्रतियोगितामा नेपालको सफलताबारे जानकारी दिनुहुने राष्ट्रिय खेलाडी क्षितिज कुमार धामीले नेपालका खेलाडीहरूको उत्कृष्ट खेल प्रदर्शनको प्रशंसा गर्दै यस ऐतिहासिक उपलब्धिमा खुशी व्यक्त गरेका छन्। साथै, उनले आगामी दिनहरूमा पनि नेपालले यस्तै सफलता हासिल गर्ने विश्वास व्यक्त गरेका छन्।

नेपालको सेपाक ताक्रो टोलीले २३ वर्षपछि स्वर्ण पदक जितेर खेलकुद क्षेत्रमा ठूलो सफलता हासिल गरेको छ।