बिर्तामोडमा मोटरसाइकल दुर्घटना हुँदा दुईजनाको मृत्यु

साझापाना २०७९ कात्तिक २ गते १०:५२ मा प्रकाशित

झापा। झापाको बिर्तामोड नगरपालिकामा सोमबार बेलुका मोटरसाइकल एक–आपसमा जुध्दा भएको दुर्घटनामा दुईजनाको मृत्यु भएको छ । दुर्घटनामा एक बालिकासहित दुईजना घाइते भएका छन् ।

बिर्तामोड–२ बेलडाँगीमा दक्षिणबाट उत्तरतर्फ आउँदै गरेको मे ५ प १६०४ नम्बरको मोटरसाइकल र विपरीत दिशाबाट जाँदै गरेको मे ३ प ५५८० नम्बरको मोटरसाइकल एक आपसमा ठक्कर खाई दुर्घटना हुँदा दुवै मोटरसाइकल चालकको मृत्यु भएको जिल्ला प्रहरी कार्यालय झापाले जनाएको छ ।

मृत्यु हुनेमा मे ३ प ५५८० नम्बरका मोटरसाइकल चालक बाह्रदशी–२ का २५ वर्षीय अनिस साउदेन र मे ५ प १६०४ नम्बरका मोटरसाइकल बाह्रदशी–६ का ४३ को भोलाराज भुजेल रहेका छन् । दुर्घटनामा गम्भीर घाइते भएका उनीहरुलाई बीएण्डसी अस्पताल बिर्तामोड पठाइएकोमा उपचारको क्रममा दुवै मोटरसाइकल चालकको बेलुका मृत्यु भएको हो ।

भुजेलको मोटरसाइकलमा सवार उनकी पत्नी ४२ वर्षीया चन्द्रकला भुजेल र ९ वर्षीया छोरी प्रश्ना भुजेल घाइते भएका छन् । घाइते आमा–छोरीको बिर्तामोडको बिर्तासिटी अस्पतालमा उपचार भइरहेको प्रहरीले जनाएको छ ।

क्याटेगोरी : समाचार
ट्याग : #बिर्तामोडमा मोटरसाइकल दुर्घटना हुँदा दुईजनाको मृत्यु, #मोटरसाइकल दुर्घटना हुँदा एक युवकको मृत्यु