केदारनाथ नजिकै हेलिकोप्टर दुर्घटना, पाइलटसहित सवार सबै सात जनाको मृत्यु

साझा पाना २०७९ कात्तिक १ गते १४:५७ मा प्रकाशित

काठमाडौं । भारतको उत्तराखण्ड राज्यमा पर्ने केदारनाथ नजिकै हेलिकोप्टर दुर्घटना हुँदा पाइलटसहित त्यसमा सवार सबै सात जनाको मृत्यु भएको छ ।

प्रसिद्ध धार्मिकस्थल केदारनाथ भन्दा झण्डै दुई किलोमिटर टाढा गरुडचट्टी भन्ने स्थानमा आज दिउँसो खराब मौसमका कारण हेलिकोप्टर दुर्घटना भएको बताइएको छ ।

उत्तराखण्ड नागरिक उड्डयन प्राधिकरणका प्रमुख कार्यकारी अधिकृत रविशंकरले हेलिकप्टर दुर्घटनामा पाइलट अनिल सिंहसहित सात जनाको मृत्यु भएको जानकारी दिनुभएको भारतीय सञ्चारमाध्यमहरूले उल्लेख गरेका छन् ।

भारतका प्रधानमन्त्री नरेन्द्र मोदीले दुर्घटनाप्रति दुःख व्यक्त गर्दै मृतकका परिवारजनमा समवेदना व्यक्त गरेका छन् ।

क्याटेगोरी : अन्तर्राष्ट्रिय, समाचार
ट्याग : #केदारनाथ नजिकै हेलिकोप्टर दुर्घटना