पदमा रहे पनि नरहे पनि दोलखाली जनताको साथमा सधैं रहने छु : पार्वत गुरुङ

साझापाना २०७९ असोज २ गते ११:३२ मा प्रकाशित

काठमाडौं । नेकपा एमालेका पोलिटव्युरो सदस्य एवम् प्रतिनिधिसभाका सांसद पार्वत गुरुङले आगामी दिनमा पदमा रहे पनि वा नरहे पनि सम्पूर्ण दोलखाली जनताको साथमा सधैं रहने प्रतिबद्धता व्यक्त गरेका छन् ।

दोलखाली जनताको बलमा आफू सांसद तथा मन्त्री बन्न सफल भएको स्मरण गर्दै सांसद गुरुङले सम्पूर्ण दोलखाली जनता र आफूसम्बद्ध पार्टी नेकपा एमालेलाई धन्यवाद ज्ञापन गरेका छन् ।

प्रतिनिधिसभाको पाँच वर्षे कार्यकाल पूरा हुनु केही घण्टाअघि उनले सामाजिक सञ्जालमार्फत दोलखाली जनताको उच्च सम्मान गर्दै धन्यवाद प्रकट गरेका हुन् ।

‘प्रतिनिधिसभाको पहिलो कार्यकालको अन्तिम बैठक दोलखाली जनता, हाम्रो पार्टी नेकपा एमाले र नेपालको संविधानले दिएको जिम्मेवारी इमान्दारिताका साथ पूरा गर्दै आज असोज १ गते रातको १२ बजेदेखि समाप्त हुँदैछ,’ उनले लेखेका छन्, ‘यसबीचका आरोह अवरोह, कठिन घुम्ती र मोडहरुलाई पार गर्दै पाँच वर्षको यो यात्रामा म सांसद, मन्त्री हुँदा र हाम्रो पार्टी सरकारमा रहँदाको उपलब्धी दोलखाली जनताको बलमा प्राप्त भएको हो ।’

आफूलाई राज्यको महत्वपूर्ण जिम्मेवारीमा पुर्याउन मार्गदर्शन गर्ने सम्पूर्ण दोलखाली जनता, नेकपा एमाले र आफूसम्बद्ध पार्टी नेतृत्वप्रति उनले धन्यवाद ज्ञापन गर्दै लेखेका छन्, ‘यो सबै काममा मार्गदर्शन गर्नुहुने सम्पूर्ण दोलखाली जनता, नेकपा एमाले र पार्टी नेतृत्वप्रति हार्दिक धन्यवाद दिन चाहन्छु । मलाई विश्वासका साथ यो जिम्मेवारी दिनुहुने दोलखाली जनतालाई सम्मान गर्दै आउने दिनमा पदमा रहे पनि नरहे पनि सम्पुर्ण दोलखाली जनताको साथमा रहने प्रतिबद्धता व्यक्त गर्दछु ।’

क्याटेगोरी : समाचार
ट्याग : #नेकपा एमाले, #पार्वत गुरुङ