एनएनआईपीए स्पोर्ट अवार्ड २०८१ सम्पन्न, एरिका र विजय सर्वोत्कृष्ट खेलाडी पुरस्कारबाट सम्मानित

साझापाना २०८१ पुस २१ गते ११:१२ मा प्रकाशित

काठमाडौँ, पुस २१ गते । नेपाल राष्ट्रिय तथा अन्तर्राष्ट्रिय खेलाडी संघ अवार्डमा महिलातर्फ एरिका गुरुङ र पुरुषतर्फ विजय सिञ्जाली सर्वोत्कृष्ट खेलाडी बनेका छन् । उनीहरूलाई जनही १–१ लाख रूपैयाँसहित सम्मान गरिएको हो ।

त्यस्तै अश्विन रावत प्रतिभाशाली खेलाडी (पुरुष) र प्रतिभाशाली खेलाडी (महिला) मनमती विष्टलाई प्रदान गरिएको छ । उनीहरूलाई जनही ५०–५० हजार सहित सम्मान गरिएको हो ।

पारा एथलेटिक्स तर्फ पलेशा गोवर्धन र गजराज आदर्श व्यक्तित्व अवार्ड रघुराज वन्तलाई प्रदान गरिएको छ । यसका साथै १९ औं एसियन गेम्समा उत्कृष्ट प्रदर्शन गर्ने खेलाडीलाई पनि सम्मान गरिएको छ । मनमैजुमा आयोजना गरिएको एक कार्यक्रमका बिच २९ खेलाडीलाई जनही १० हजार रूपैयाँ र ट्रफी सहित सम्मान गरिएको हो ।

कार्यक्रममा प्रमुख अतिथि राष्ट्रिय खेलकुद परिषदका सदस्य सचिव टंकलाल घिसिङ रहेका थिए । त्यस्तै अतिथिहरुमा कार्यक्रमको होस्ट तारकेश्वर नगरपालिकाका नगर प्रमुख कृष्णहरि महर्जन, बनेपा नगरपालिकाको नगर प्रमुख शान्तिरत्न शाक्य, नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठ, नेपाल ओलम्पियन्स संघका अध्यक्ष दीपक विष्ट लगायतले खेलाडीहरुलाई अवार्ड र नगद प्रदान गरेर सम्मान गरेका थिए ।

कार्यक्रममा हाँस्य कलाकार सन्दीप क्षेत्रीले मनोरन्जन प्रदान गरेका थिए । मनमैजुको चर्चित सामुहिक धिमेनाच लगायत नेवारी नाच तथा गायनहरु प्रस्तुत गरिएको थियो । २०८१ को उत्कृष्ट खेलाडी सम्मान कार्यक्रम बनेपा नगरपालिकाले गर्ने जनाएको छ ।