काठमाडौ । आजबाट रिलिज हुने भनिएको चलचित्र ‘एक्टर टेक वान’ को प्रदर्शन हल सञ्चालकहरुले रोकेका छन् । जिल्ला अदालत काठमाडौंले हिजो चलचित्रको प्रदर्शन एक हप्ता रोक्न अल्पकालीन आदेश दिएको थियो ।

अदालतको आदेश विपक्षीहरुसम्म पुगेको भने छैन । मिडियामा आएका समाचारहरुकै आधारमा हल सञ्चालकहरुले प्रदर्शन रोक्ने निर्णय लिएका हुन् । यसमा चलचित्रको निर्माण पक्ष सन्तुष्ट छैन ।

निर्माता थमनकुमार भण्डारीले भने, ‘चलचित्र विकास बोर्डबाट स्वीकृति लिएर निर्माण भएको र सेन्सर बोर्डबाट पास भएको चलचित्रलाई हल सञ्चालकहरुले के आधारमा रोक्नुभयो भन्ने हामीले बुझेका छैनौं । अदालतको चिठी नआउँदासम्म प्रदर्शन रोक्न कुनै कानूनी रोकावट थिएन ।’

आज र भोलि दुई दिन सार्वजनिक बिदाको अवसर पारेर रिलिज हुन लागेको चलचित्रलाई अदालतको आदेशले ठूलो धक्का लागेको छ । अहिलेसम्म निर्माणपक्षलाई मुद्दाको विषयमा कुनै निकायबाट औपचारिक जानकारी नै नआएको भण्डारी बताउँछन् । यसको जिम्मेवारी विकास बोर्ड लिनुपर्ने उनको भनाइ छ ।

‘हामीले कुनै पनि गल्ति गरेका छैनौं । स्वीकृति दिने विकास बोर्ड जिम्मेवार हो । हामीलाई ठूलो आर्थिक नोक्सानी भएको छ । विकास बोर्ड र हल सञ्चालकहरुसँग क्षतिपूर्ति माग्न बाध्य हुनेछौं,’ उनले भने ।

यो विषयमा विकास बोर्डले कुनै औपचारिक धारणा बाहिर ल्याएको छैन । बोर्ड स्रोतले अदालतको आदेशमा बोर्डले औपचारिक टिप्पणी र आलोचना गर्न नमिल्ने बतायो । तर, यो प्रकरणमा बोर्डको पनि कुनै गल्ति नरहेको स्रोतको दावी छ ।

‘बोर्डले कानूनी व्यवस्था र चलिआएको चलनअनुसार नै स्वीकृति दिएको हो, त्यसैले बोर्ड जिम्मेवार छैन,’ स्रोतले भन्यो ।

अहिलेको अभ्यासमा कुनै पनि चलचित्रको नामको अगाडि वा पछाडि फुर्को जोडेर अर्को चलचित्र निर्माण गरिँदै आएको छ । उदाहरणका लागि ‘ए मेरो हजुर’ र ‘मेरो हजुर’ बेग्लाबेग्लै चलचित्र हुन् । यसरी नाम राख्न कपिराइट कानूनले पनि नरोक्ने बोर्ड स्रोतको दावी छ ।

‘एक्टर टेक वान’ चलचित्रलाई सुरुवातमा ‘आइ एम एक्टर’ नामबाट बोर्डमा दर्ता गरिएको थियो । पछि नाम परिवर्तन गरेर ‘आइएम एक्टर’ राखिएको हो । ‘आइ एम एक्टर’ नाम राख्दा बोर्ड अध्यक्ष भुवन केसी थिए । ‘एक्टरस् टेक वान’ बनाउँदा बोर्डमा अध्यक्ष नरहेको भण्डारीले बताए ।

क्याटेगोरी : मनोरञ्जन/साहित्य, समाचार
ट्याग : #अदालतको चिठीबिनै हलहरुले रोके ‘एक्टर: टेक वान’, #निर्माण पक्षले क्षतिपूर्ति माग्ने

---

---

---