टोखाका मेयर प्रकाश अधिकारीको जनकल्याणकारी घोषणा: नवशिशुका लागि रु ५,०००, मुटुरोगीलाई रु ५०,०००, क्यान्सर पीडितलाई रु ३५,००० र क्रियाखर्चमा रु १०,००० अनुदान

साझा पाना २०८२ असार १२ गते १४:०४ मा प्रकाशित

काठमाडौं, असार । टोखा नगरपालिकाले जनस्वास्थ्य, सामाजिक सुरक्षा तथा नागरिक कल्याणलाई केन्द्रमा राख्दै ऐतिहासिक र जनमुखी निर्णयहरू सार्वजनिक गरेको छ। असार ५ गते सम्पन्न नगर परिषदको बैठकबाट घोषणा गरिएका यी निर्णयहरू नगरवासीको जीवनसँग प्रत्यक्ष रूपमा सम्बन्धित रहेका छन्। नगरप्रमुख प्रकाश अधिकारीको नेतृत्वमा पारित भएका यी योजनाहरू मानव जीवनको सम्पूर्ण चक्र—जन्मदेखि मृत्युसम्म—लाई समेट्ने उल्लेखनीय प्रयासका रूपमा लिइएको छ।

नगरपालिकाले अबदेखि नगरभित्र जन्मिने प्रत्येक नवजात शिशुको नाममा अनिवार्य रूपमा रु ५,००० को सुरुआती बचत प्रदान गर्ने घोषणा गरेको छ। यो योजना शिशुको शिक्षा र भविष्य निर्माणका लागि प्रारम्भिक लगानीको रूपमा कार्यान्वयन गरिने बताइएको छ। मेयर अधिकारीले भने, “शिशुको भविष्य बलियो बनाउन जन्मेको दिनदेखि नै राज्यले हात थाम्नुपर्छ भन्ने सोचसँगै यो योजना ल्याइएको हो।”

त्यस्तै, मृत्यु भएका व्यक्तिहरूका परिवारलाई क्रिया खर्च स्वरूप रु १०,००० प्रदान गरिने निर्णय गरिएको छ। यसले दुःखको समयमा पीडित परिवारको आर्थिक बोझ कम गर्न महत्वपूर्ण भूमिका खेल्ने अपेक्षा गरिएको छ। “मानव जीवनको अन्तिम क्षणमा पनि राज्यको साथ रहोस् भन्ने हाम्रो मान्यता हो,” मेयर अधिकारीले बताए।

गम्भीर बिरामीहरूका लागि पनि नगरपालिकाले विशेष राहत कार्यक्रम ल्याएको छ। मुटुरोग, क्यान्सर र मृगौलाका समस्याबाट पीडित नगरवासीलाई शहिद गंगालाल अस्पतालमा मुटु सम्बन्धी उपचार वा सर्जरी गराएमा रु ५०,००० सम्मको सहयोग प्रदान गरिनेछ। यस्तै, क्यान्सर तथा मृगौलाका बिरामीहरूलाई रु ३५,००० सम्मको अनुदान उपलब्ध गराइनेछ। यी सहायता कार्यक्रमहरू बिरामी तथा उनका परिवारका लागि उपचार खर्च सहज बनाउने उद्देश्यले ल्याइएको जनाइएको छ।

स्वास्थ्यप्रति दीर्घकालीन प्रतिबद्धता स्वरूप नगरपालिकाले ‘मेयर दीर्घायु कार्यक्रम’लाई अझ प्रभावकारी बनाउने निर्णय पनि गरेको छ। यस अन्तर्गत हरेक नगरवासीका लागि नियमित स्वास्थ्य परीक्षण, जनचेतना अभिवृद्धि तथा आवश्यक सेवा प्रवाहमा सुधार ल्याइनेछ। मेयर अधिकारीका अनुसार, “टोखा नगरपालिकाले हरेक नागरिकको स्वास्थ्यलाई राज्यको जिम्मेवारी ठानी योजना बनाएको हो। हाम्रो लक्ष्य सबै नगरवासीलाई निरोगी, सशक्त र सुरक्षित बनाउनु हो।”

यो निर्णय केवल कागजी घोषणामा सीमित नरही व्यवहारमा कार्यान्वयन हुने ठोस कार्यक्रम भएको नगरपालिकाले स्पष्ट पारेको छ। जन्मिएको बालकको शिक्षादेखि गम्भीर रोगीको उपचार र मृत्युपछि परिवारको सहारा बन्ने यस्ता योजनाहरूले जनकल्याणकारी शासनको उत्कृष्ट उदाहरण प्रस्तुत गरेका छन्। यी योजनाहरूले स्थानीय सरकारप्रतिको जनविश्वास र नागरिक सहभागिता थप सुदृढ गर्ने विश्वास नगरवासीहरूले व्यक्त गरेका छन्।