सिटीलाई अर्को झड्का, डिफेन्डर जोन स्टोन्स घाइते

साझापाना २०८१ पुस १० गते ०९:५२ मा प्रकाशित

काठमाडौं । यो सिजन खराब लयबाट गुज्रिएको इंग्लिस प्रिमियर लिग ९इपीएल०को डिफेन्डिङ च्याम्पियन म्यानचेस्टर सिटीको लागि खराब समाचार आएको छ ।

उसको नियमित डिफेन्डर जोन स्टोन्सले बक्सिङ डे मा हुने एभर्टन विरुद्धको खेल गुमाउने भएका छन् ।

शनिवार एस्टन भिल्लासङ्गको खेलमा घाइते भएका जोनले कम्तीमा एक खेल गुमाउने भएपछि लय बिग्रिएको सिटीलाई लयमा ल्याउन प्रशिक्षक गार्डिओलालाई थप समस्या हुने देखिएको हो ।

३० वर्षीय डिफेन्डरले घाइते हुनुअघि भिल्ला विरुद्ध ४५ मिनेट मात्र मैदानमा खेलेका थिए । उनले आफूलाई असहज महसुस भएको जनाउ दिएपछि सिटिले उनको ठाउँमा काइल वाकरलाई प्रतिस्थापन गरेको थिए ।

सिटीले पछिल्लो समय खेलेको १२ खेलमा १ मा मात्र जित निकालेपछि प्रशिक्षक गार्डिओला पूर्ण रूपमा दबाबमा छन् ।

जारी सिजनको १७ औँ चरणको खेल सम्पन्न हुँदा सिटी २७ अङ्क सहित सातौँ स्थानमा छ । उ भन्दा एक खेल कम खेलेको लिग लिडर लिभरपुलको ३९ अङ्क छ । अब यो सिजन उपाधि रक्षा गर्ने सिटीको सम्भावना लगभग अन्त्यको अवस्थामा देखिन्छ ।

क्याटेगोरी : खेलकुद
ट्याग : #डिफेन्डर जोन स्टोन्स घाइते, #सिटीलाई अर्को झड्का