मिलन एफसीले जित्यो सेभेन ए साइडको उपाधि

साझापाना २०८१ असोज ११ गते २२:१६ मा प्रकाशित

प्रदीप ढकाल ,भक्तपुर
असोज ११, शुक्रबार ।

पहिलो रोयल नेपाल सेभेन ए साइड खुल्ला फुटसल प्रतियोगिता २०८१ को उपाधि मिलन एफसी ए ले जितेको छ। शुक्रबार भएको फाइनल भिडन्तमा मिलन एफसी ए ले मिलन एफसी बि लाई ३–१ ले हराउँदै उपाधि उचाल्न सफल भएको हो ।

पेप्सिकोला स्थित दिव्यश्वरी प्लानिंगको रोयल नेपाल फुटसलमा भएको फाइनल खेलमा मिलन एफसी एको तर्फ़बाट बिक्रान्त नरसिंह राणाले २ गोल गरे। विजेता बनेको मिलन एफसी ए ले शिल्ड, मेडल सहित २,०२,२२२ रुपैयाँ नगद पुरस्कार हात पार्यो भने उपविजेता मिलन एफसी बि ले १,०१,१११ रुपैयाँमा चित्त बुझायो । विजयी खेलाडीहरुलाई एन्फा महासचिव किरण राईले पुरस्कृत गरे। प्रतियोगिताको सर्वोत्कृष्ट खेलाडी मिलन एफसी बि का सबिन खड्का चुनिए । रोयल नेपाल फुटसलको आयोजनामा भएको २ दिने प्रतियोगितामा कुल २६ टोलीले सहभागिता जनाएका थिए ।