मोबाईल चोरलाइ सुटुक्क छाड्ने खोलेसिमलका असईको जिम्मेवारी खोसियो, डिएसपी भन्छ : मलाई थाहा छैन

प्रनिश थापा चितवन संवाददाता २०७९ फागुन ११ गते ०९:३३ मा प्रकाशित

चितवन । आर्थिक लेनदेनको आशंकामा प्रहरी चौकी खोलेसिमलका प्रहरी सहायक निरीक्षक (असई) टेक प्रसाद तिमिल्सिनालाई हटाइएको छ । मंगलबार दुई जना मोबाईल चोरलाइ पक्राउ गरी आफू भन्दा माथिल्लो निकायलाई जाहेर नगरी सुटुक्क छाडिएको भन्दै ईलाका प्रहरी कार्यालय रत्ननगरले उनलाई त्यहाँको जिम्मेवारीबाट हटाइएको हो ।

प्रहरी स्रोतका अनुसार मंगलबार मोबाईल चोरी गरेको आरोपमा रत्ननगर नगरपालिका १२ का एक युवा र कालिका नगरपालिका ६ का अर्का एक युवालाई खोलेसिमल प्रहरीले पक्राउ गरेको थियो । पक्राउ परेकाहरुको बिषयमा आफू भन्दा माथिल्लो निकायमा जाहेर नै नगरी सुटुक्क छाडिएको भन्दै उनको जिम्मेवारी खोसिएको हो ।

उनलाई अहिले जिल्ला प्रहरी कार्यालयमा थन्क्याइएको छ । असोज ७ गते जिल्ला प्रहरी कार्यालय चितवनबाट प्रहरी चौकी खोलेसिमल गएका असई तिमिल्सिनाले उन्मुक्ति दिएका एक जनालाइ मंगलबार राती नै प्रहरीले पक्राउ गरेको थियो भने अर्का एक जनालाई पक्राउ परेकाको बयानका आधारमा प्रहरीले बुधबार मात्रै पक्राउ गरेको थियो ।

पक्राउ परेका दुवैलाई अहिले ईलाका प्रहरी कार्यालय रत्ननगरको हिरासतमा राखी थप अनुसन्धान सुरु गरिएको प्रहरीले जनाएको छ । उनीहरुसंग गरिएको सोधपुछका क्रममा खोलेसिमलका असई तिमिल्सिनाको भुमिका शंकास्पद देखियो । प्रहरी स्रोत भन्छ : त्यसलगत्तै उनलाई बुधबार ईलाका प्रहरी कार्यालय रत्ननगर तानेर उनको ठाउँमा प्रहरी सहायक निरीक्षक राज कुमार राय यादवलाई पठाइएको छ ।

स्रोतका अनुसार घट्नामा प्रहरीको संलग्नता रहेको पाइएपछि उनलाई टाँडी प्रहरीले जिल्लामा रवाना गरिएको हो । पक्राउ परेका दुवै जनासंग आर्थिक लेनदेन गरी छाडिएको सूचना बाहिरिएसंगै चितवन प्रहरी बिवादित बनेको छ ।

कार्यक्षमतामा अत्यन्तै कमजोर रहेका ईलाका प्रहरी कार्यालय टाँडीका डिएसपी अनिल कुमार खड्काको कमजोर पुलिसिङका कारण पछिल्लो समय टाँडी प्रहरीभित्र समेत बेथिति बढ्दै गएको छ । यता, जिल्ला प्रहरी कार्यालय चितवनका सूचना अधिकारी बिजयराज पण्डितले भने आफूलाई यस बिषयमा केही थाहा नभएको बताए ।

क्याटेगोरी : अपराध/सुरक्षा, ब्रेकिंग न्युज, विशेष, देश परदेश, समाचार, स्थानीय