जनकपुरधाम । मधेस प्रदेशका मुख्यमन्त्री सरोजकुमार यादवले प्रदेश सभाबाट विश्वासको मत प्राप्त गर्नुभएको छ ।

मुख्यमन्त्री यादवलाई बैठकमा उपस्थित १०२ जना सदस्यबाटै सर्वसम्मत रुपमा विश्वासको मत प्राप्त भएको हो । मुख्यमन्त्री नियुक्त भएको नवौं दिनमा उहाँले विश्वासको मत पाउनुभएको हो ।

प्रदेशसभाका सभामुख रामचन्द्र मण्डलले प्रस्तावको पक्षमा १०२ र विपक्षमा शून्य मत खसेको बैठकमा घोषणा गर्नुभयो । मधेश प्रदेशमा १०७ जनामध्ये २ जना सर्वोच्च अदालतको आदेशका कारणले शपथ नलिएको र हाल कायम १०५ मध्ये ३ जना प्रदेश सभाका सदस्य अनुपस्थित रहनुभएको थियो ।

मुख्यमन्त्री यादवले नेकपा एमालेका २३, कांग्रेसका २२, जसपाका १६, जनमत पार्टीका १३, लोसपाका ९, नेकपा माओवादी केन्द्रका ७, नेकपा एकीकृत समाजवादीका ७, नागरिक उन्मुक्ति पार्टीका १, राष्ट्रिय प्रजातन्त्र पार्टीका १, नेपाल संघीय समाजवादी पार्टीका १ तथा चार जना स्वतन्त्र गरी १०२ प्रदेश सांसदको समर्थन प्राप्त गर्नुभएको हो ।

सभामुख रामचन्द्र मण्डल मुख्यमन्त्री माथिको विश्वासको मतमा तटस्थ बस्नुभएको थियो ।

क्याटेगोरी : समाचार
ट्याग : #मधेस प्रदेश, #सरोजकुमार यादव

---

---

---