अमेरिकाले नेपालमा निजी क्षेत्रको सहकार्यमा लगानी गर्ने तयारी गरेको छ : डिन आर थम्पसन

साझापाना २०७९ पुस २ गते १६:४८ मा प्रकाशित

खजुरा । नेपालका लागि अमेरिकी राजदूत डिन आर थम्पसनले अब निजी क्षेत्रको सहकार्यमा अमेरिकाले नेपालमा लगानी गर्ने तयारी गरिरहेको बताएका छन् ।

नेपालको आर्थिक समृद्धिका लागि अमेरिकी सरकारले विशेष सहयोग गर्दै आएको बताउँदै उनले नेपाललाई वकसित मुलुकको सूचीमा पार्नका लागि निरन्तर सहयोग गरिरहने पनि स्पष्ट पारेका छन् ।

पश्चिम नेपालको भ्रमणका क्रममा नेपालगञ्ज आइपुगेका राजदूत थम्पसनले भने, ‘नेपाललाई वकसित मुलुकको सूचीमा पार्नका लागि यहाँ विकासका पूर्वाधार तयार गर्न बाँकी छन्, त्यसलाई पूरा गर्न अमेरिकी सरकारको सहयोग निरन्तर रहनेछ ।’

नेपालको समग्र विकासका लागि विभिन्न क्षेत्रअन्तर्गत परियोजनामार्फत विशेषगरी शिक्षा, स्वास्थ्य, कृषि, विपत्, वातावरणलगायत क्षेत्रलाई मुख्य प्राथमिकतामा राखेको उनको भनाइ छ । नेपालमा सूचना, प्रविधि र अङ्ग्रेजी भाषाका विशेष कार्यक्रम ल्याउने तयारी भइरहेको पनि उनले बताए । ‘नेपालमा धेरै काम गर्न अझ बाँकी छ, यहाँका सडक, जलविद्युत्, विभिन्न साना तथा मझौला उद्योगको विकासमा विशेष जोड दिन चाहन्छौँ,’ उनले भने ।

नेपालमा सञ्चालित विभिन्न कार्यक्रमले समुदायस्तरका नागरिकमा राम्रो परिवर्तन ल्याएको उदाहरण भ्रमणका क्रममा भेटिएको भन्दै राजदूत थम्पसनले समावेशिताको कुरामा सुधार भएको र सीमान्तकृत तथा अल्पसङ्ख्यक समुदायलाई पनि थप सहयोग पुगेको चर्चा गरे ।

क्याटेगोरी : समाचार
ट्याग : #डिन आर थम्पसन