प्रेमीकी श्रीमती र छोरी कुट्ने लुम्बिनीकी मन्त्री विमलालाई जिप्रका लगियो

साझा पाना २०७९ जेठ ३१ गते १६:१५ मा प्रकाशित

दाङ। लुम्बिनी प्रदेशकी स्वास्थ्य राज्यमन्त्री विमलाकुमारी खत्री वलीलाई जिल्ला प्रहरी कार्यालय दाङ लगिएको छ ।

प्रेमीको श्रीमती र छोरीलाई कुटपिट गरेपछि प्रहरीको नियन्त्रणमा रहेकी उनलाई लगिएको हो ।

उनीमाथि परेको मुद्दा जिप्रकाबाटै अघि बढाइने दाङ प्रहरीले जनाएको छ ।

विमलाले मंगलबार बिहान प्रेमी एकराज बस्नेतको तुलसीपुर ५ आलुमण्डीस्थित घरमै गएर एकराजकी श्रीमती मीना भण्डारी बस्नेत र उनकी छोरीलाई कुटपिट गरेकी थिइन् । हातपात गर्दा भण्डारीलाई चोटपटक लाग्नुका साथै कुर्ता समेत च्यातिएको थियो ।

विमला एकराजको घरमा पीएसओसहित झण्डावाल गाडीमा पुगेकी थिइन् । प्रहरीले विमलालाई इप्रकाबाट निकाल्दा स्थानीयले नाराबाजी गरेका थिए । त्यसपछि प्रहरीले जिप्रकातर्फ लगेको हो।

प्रहरीले पीडितका घाउ जाँच गराएको छ । श्रीमानको प्रेमिकाबाट कुटिएकी बस्नेतले स्वास्थ्य राज्यमन्त्री वलीविरुद्ध जाहेरी दिन जिप्रका दाङ जाँदै छिन् । उनले स्थानीय एक वकिलकहाँ पुगेर निवेदन तयार पारेकी थिइन् ।

क्याटेगोरी : अपराध/सुरक्षा, समाचार
ट्याग : #विमलाकुमारी खत्री वली