तारकेश्वर सडक योजना: शिशिर खनालको १० करोडको परियोजना भिमसेनदासको नाममा प्रचार

साझा पाना २०८२ जेठ २२ गते १६:२४ मा प्रकाशित

तारकेश्वर नगरपालिका वडा नं. २ को कोइराले खालादेखि सिम्लेश्वर जोड्ने सडक निर्माण कार्य सुरु भएको छ। यो परियोजना संघीय सांसद् शिशिर खनालको पहलमा अघि बढाइएको हो। ‘एक निर्वाचन क्षेत्र, एक रणनीतिक योजना’ अन्तर्गत सडक विभाग, सडक डिभिजन कार्यालय काठमाडौंले १० करोडको स्वीकृत बजेटमध्ये ७ करोडमा ठेक्का प्रक्रियासहित निर्माण कार्य थालेको हो।

तर यो योजनासम्बन्धी तथ्याङ्कमा सामाजिक सञ्जालमार्फत भ्रम सिर्जना गरिएको छ। ‘तारकेश्वर नगरपालिका वडा नम्बर २’ नामक फेसबुक पेजमा यो योजना तत्कालीन सांसद् तथा पूर्वरक्षामन्त्री भिमसेनदास प्रधानद्वारा अघि सारिएको दावी गरिएको छ। वडाध्यक्ष राधाकृष्ण खड्कीले समेत उक्त पेजमार्फत एक भिडियो सार्वजनिक गर्दै योजनाको लागत पूर्वमन्त्री प्रधानको ९ करोडको पहलबाट आएको बताएका छन्।

यसो हुँदाहुँदै, सडक विभाग काठमाडौंका इन्जिनियर उज्वल मिश्रले भने योजना हालका सांसद् शिशिर खनालको पहलमा अघि बढाइएको प्रस्ट पारे। उनका अनुसार, ‘एक निर्वाचन क्षेत्र, एक रणनीतिक योजना’ अन्तर्गत सांसद् खनालको निरन्तर प्रयासमा १० करोडको योजना स्वीकृत भएको र ७ करोडमा ठेक्का दिइएको हो।

सांसद् खनालका स्वकीय सचिव लोचन पौडेलका अनुसार, गत वर्ष पनि १ करोड बजेट विनियोजन गरिएको थियो भने यसपालि निरन्तर पहलपछि १० करोडको बजेट स्वीकृत भएको हो। पौडेलले सडक योजना अगाडि बढाउन आफूले पटक–पटक सम्बन्धित निकायमा चिठी लिएर धाएको र त्यसपछि मात्रै ठेक्का प्रक्रिया अघि बढेको बताए।

सांसद् खनालको सचिवालयले वडाको आधिकारिक फेसबुक पेजबाट गलत सूचना प्रवाह हुनु दु:खद भएको प्रतिक्रिया दिएको छ। “विगतका योजनामा स्पष्टता नरहँदा अहिलेको योजनालाई कसैको नाममा प्रचार गर्नु जनतामा भ्रम सिर्जना गर्नु हो,” पौडेलले बताए।

स्थानीय बासिन्दाले समेत तत्कालीन सांसद्ले उक्त योजनाका लागि बजेट विनियोजन गर्न नसकेको पुष्टि गरेका छन्। उनीहरूका अनुसार हाल निर्माण सुरु भएको योजना हालै सांसद् शिशिर खनालको पहलमा मात्र सम्भव भएको हो।