चितवनका एसपी पुरीले सम्हाले कमान्ड, शुन्य सहनशीलतामा काम गर्न निर्देशन

प्रनिश थापा चितवन संवाददाता २०८२ वैशाख २४ गते १४:५७ मा प्रकाशित

जिल्ला प्रहरी कार्यालय चितवनमा सरुवा भएर आएका एसपी गोबिन्द पुरीले आज (बुधबार) देखि आफ्नो कार्यभार सम्हालेका छन् ।

जिल्ला प्रहरी कार्यालय चितवनका प्रहरी उपरीक्षक राजन लिम्बु जिल्ला प्रहरी कार्यालय झापा सरुवा भएर गएपछि उनको ठाउँमा प्रहरी प्रधान कार्यालयले पुरीलाई पठाएका हुन् । उनलाई डिएसपी रविन्द्र खनालले स्वागत गरेका थिए ।

स्वागत कार्यक्रममा उनले आफू मातहतका प्रहरी कर्मचारीलाई उच्च व्यवसायिकता प्रदर्शन गरेर काम गर्न निर्देशन समेत दिएका छन्। सेवाग्राहीको गुनासो तत्काल सम्बोधन गर्नुपर्ने, काम गर्दा व्यसायिकतामा आँच नआउने गरी काम गर्नुपर्ने, सेवाग्राहीलाई विशेष प्राथमिकतामा राखेर द्रूत सेवा दिई शून्य सहनशीलतामा काम गर्न उनलेे निर्देशन दिएका छन् ।

चितवनलाई सुरक्षित शहर बनाउन प्रहरीको मुख्य भूमिका हुने भएकाले सोही अनरुप आफ्नो ड्युटी गर्नुपर्ने उनले प्रहरीलाई सुझाए । पुरी प्रहरी संगठनभित्र सफल प्रहरी अधिकारीका रुपमा समेत आफुलाई परिचित गर्न सफल भएका छन् । २०७१ फागुन १ गते प्रहरी निरीक्षकबाट प्रहरी नायब उपरीक्षकमा बढुवा भएका उनी प्रहरी बृत्त सिंहदरबार, ईलाका प्रहरी कार्यालय सिमरा बारा जस्ता महत्त्वपूर्ण क्षेत्रमा काम गरेर अनुभव बटुलिसकेका छन् ।

प्रहरी संगठनमा दुरगामी र सकारात्मक प्रभाव पार्ने नयाँ अभियानको सिर्जना गर्ने क्षमतावान बौद्धिक प्रहरी अधिकृतका रुपमा समेत परिचित उनी विभिन्न जघन्य अपराधलाई अनुसन्धान गरी टुँगोमा पुर्याउन सफल भएकै कारण अपराध अनुसन्धानमा अब्बल प्रहरी अधिकृतका रुपमा समेत चिनिएका उनी २०८० बैशाख २९ मा एसपीमा बढुवा भएका थिए । त्यसपछि झन्डै दुई बर्ष उनी प्रहरी प्रधान कार्यालयको प्रबन्ध शाखामा कार्यरत रही आज चितवनको कमान्ड सम्हाल्न आइपुगेका हुन् ।