एमालेले प्रधानमन्त्रीलाई बुझायो संकल्प यात्राका मागको ज्ञापनपत्र

साझा पाना २०८० माघ ९ गते १२:५१ मा प्रकाशित

काठमाडौं, ९ माघ । नेकपा (एमाले)ले मध्यपहाडी पुष्पलाल लोकमार्ग समृद्धिका लागि संकलप यात्राको क्रममा प्राप्त भएका जनताका माग र समस्या सम्बोधन गर्न सरकारसँग माग गरेको छ ।

एमाले अध्यक्ष केपी शर्मा ओलीले मंगलबार बिहान प्रधानमन्त्री पुष्पकमल दाहाल प्रचण्डलाई भेटेर नागरिकले राख्नु भएका माग समेटेर ज्ञापनपत्र बुझाउनुभएको छ । पार्टी अध्यक्ष ओलीले नागरिकका माग सम्बोधन गर्न प्रधानमन्त्रीलाई आग्रह गर्नुभएको छ ।

मध्यपहाडको १८ दिने यात्राका क्रममा स्थानीय रूपमा प्राप्त भएका ४६ वटा विषयका ७ सय ५१ वटा माग प्रधानमन्त्रीलाई बुझाएको एमाले अध्यक्ष ओलीले जानकारी दिनुभयो । ‘जसमा सडक पूर्वाधार, अस्पताल, विद्यालय, मोटरेवल पुल, कृषि, पशुपालन, विद्यालय र उत्पादित कृषि वस्तुको बजार व्यवस्था सम्बन्धी विषय छन्’, ज्ञापनपत्र बुझाएपछि सामाजिक सञ्जाल फेसबुकमा एमाले अध्यक्ष ओलीले लेख्नु भएको छ ।

ओलीले नागरिकबाट आएका मागलाई सरकारको नीति तथा कार्यक्रम समावेश गरी कार्यान्वयन गर्न माग गरेको बताउनुभएको छ । ‘मैले प्रधानमन्त्रीलाई यी माग दराजमा थन्क्याएर नराख्नुहोला भनेको छु, प्रधानमन्त्रीले सरकारको नीति कार्यक्रम र बजेटमा यी विषयलाई जति सक्दो समावेश गर्ने वाचा गर्नु भएको छ । यी माग पूरा गर्न निरन्तर फलोअप गर्न हामीले पूर्व अर्थमन्त्री तथा हाम्रो पार्टीका उपाध्यक्ष विष्णु पौडेललाई जिम्मेवारी दिएका छौँ’, ओलीले लेख्नु भएको छ ।

क्याटेगोरी : समाचार
ट्याग : #hot, #एमालेले प्रधानमन्त्रीलाई बुझायो संकल्प यात्राका मागको ज्ञापनपत्र