उपसमितिको कार्यावधि कात्तिक २० गतेसम्म थप गर्ने समितिको निर्णय

साझा पाना २०८० असोज ३० गते १७:०० मा प्रकाशित

काठमाडौँ । प्रतिनिधि सभाको शिक्षा, स्वास्थ्य तथा सूचना प्रविधि समितिले चिकित्सा शिक्षा तथा प्राविधिक शिक्षा तथा व्यावसायिक तालिम परिषद् (सिटिइभिटी) को सम्बन्धन, विद्यार्थी भर्ना र गुणस्तरका सम्बन्धमा गठित उपसमितिको कार्यावधि आगामी कात्तिक २० गतेसम्मका लागि थप गर्ने निर्णय गरेको छ ।

उपसमितिका संयोजक देवेन्द्र पौडेलको आग्रहमा समितिका सभापति भानुभक्त जोशीले आज बसेको बैठकमा गर्नुभएको समय थपको प्रस्ताव सर्वसम्मतिले पारित भएको हो ।

चिकित्सा शिक्षा आयोग र सिटीइभिटीबीचको विवाद समितिसम्म आइपुगेपछि थप अध्ययनका लागि गत भदौ २५ गते बसेको समितिको बैठकले देवेन्द्र पौडेलको संयोजकत्वमा उपसमिति गठन गरेको थियो ।

बैठकमा सांसदहरुले विद्यालय शिक्षा विधेयक लगायतका विधेयकमाथि समितिले दफावार छलफल गर्नुपर्ने कार्यतालिका बनाउन सुझाव दिनुभयो ।

बैठकले एमबिबिएस अध्ययनरत एवं आन्दोलनरत विद्यार्थीको मौका परीक्षा र शुल्क फिर्तासम्बन्धी विषयमा सरोकारवालासँग छलफल गर्ने र यसका लागि सुमना श्रेष्ठको संयोजकत्वमा विद्या भट्टराई र ज्ञानु बस्नेत सुवेदीलाई अध्ययन गर्ने जिम्मेवारी दिएको छ ।

क्याटेगोरी : tags, समाचार
ट्याग : ##Bearking, #उपसमितिको कार्यावधि