प्रतिनिधिसभाको सभामुखमा एमालेका देवराज र कांग्रेसका इश्वरीदेवीको उम्मेदवारी दर्ता

साझा पाना २०७९ माघ ४ गते १६:४० मा प्रकाशित

काठमाडौँ । प्रतिनिधिसभाको सभामुख पदमा नेकपा एमालेका सांसद देवराज घिमिरे र नेपाली कांग्रेसका सांसद इश्वरीदेवी न्यौपानेले उम्मेदवारी दर्ता गराउनुभएको छ ।

संघीय संसद् भवन नयाँ बानेश्वरमा आज सत्ता साझेदार दलका तर्फबाट सांसद घिमिरेले र नेपाली कांग्रेस, नेकपा एकीकृत समाजवादी र लोकतान्त्रिक समाजवादी पार्टीका तर्फबाट सांसद न्यौपानेले सभामुख पदमा मनोनयन दर्ता गराउनुभएको हो ।

सत्ता साझेदार दलका तर्फबाट मनोनयन दर्ता गराउनुभएका घिमिरेको नेकपा एमालेका सुवासचन्द्र नेम्वाङ प्रस्तावक र नेकपा माओवादी केन्द्रका हितराज पाण्डे, राष्ट्रिय स्वतन्त्र पार्टीका रवि लामिछाने र राप्रपाका राजेन्द्र लिङ्देन समर्थक रहनुभएको छ ।

नेपाली कांग्रेसका तर्फबाट मनोनयन दर्ता गराउनुभएकी इश्वरीदेवी न्यौपानेको प्रस्तावक नेपाली कांग्रेसका विश्वप्रकाश शर्मा र नेकपा एकीकृत समाजवादीका प्रकाश ज्वाला, समर्थक रहनुभएको छ ।

यसअघि, आजै नेपाली कांग्रेस, नेकपा एकीकृत समाजवादी र लोकतान्त्रिक समाजवादी पार्टी (लोसपा) का शीर्ष नेताहरूको कांग्रेस संसदीय दलको कार्यालयमा बसेको बैठकले नेपाली काङ्ग्रेसकी सांसद ईश्वरी न्यौपानेलाई सभामुखको उम्मेदवार बनाउने निर्णय गरेको थियो ।

सभामुख चयनका लागि भोलि बिहीबार बिहान ११ः०० बजे प्रतिनिधिसभाको बैठकमा निर्वाचन हुने कार्यक्रम रहेको छ । जस अन्तर्गत बैठकमा सभामुख पदमा निर्वाचित गरियोस् भन्ने, प्रस्तावकले प्रस्ताव गर्ने समर्थकले समर्थन गर्ने तथा उम्मेदवारीको सूचनामाथि सामूहिक रुपमा छलफल हुने र दर्ता क्रम अनुसार निर्णयार्थ प्रस्तुत हुने कार्यक्रम रहेको छ ।