वीरगञ्ज । भारतले धान र चामलको निर्यात खुल्ला गरे लगत्तै वीरगन्ज नाकाबाट धान र चामलको आयात ह्वात्तै बढेको छ । मङ्सिर ४ को प्रतिनिधि तथा प्रदेशसभा निर्वाचन सकिए लगत्तै भारतबाट यसको आयात सुरु भएको हो ।

वीरगन्जस्थित एकीकृत सुरक्षा जाँच चौकी (आइसीपी) सञ्चालक इन्टरमोडल यातायात विकास समितिको तथ्याङ्क अनुसार मङ्सिर ५ देखि १७ गतेसम्म वीरगन्ज नाका हुँदै १ हजार ९ सय ४० ट्रक धान र चामल भारतबाट आयात भएको छ ।

जसमा १ हजार ९ सय १२ ट्रक धान र २८ ट्रक चामल रहेको छ । गत बिहीबार एकै दिन २ सय ५ ट्रक धान आयात भएको थियो । इन्टर मोडलका अपरेसन इन्चार्ज जितेन्द्र रसाइलीले धान चामलको आयात बढेपछि यो नाका हुँदै दैनिक भित्रिने मालवाहक सवारीको सङ्ख्या नै बढेको बताउनुभयो ।

यसअघि दैनिक ४ सयदेखि ४ सय ५० को हाराहारीमा मालवाहक सवारी साधन दैनिक भित्रिने गरेकोमा डेढ साता यता भने दैनिक ५ सयदेखि ५ सय ५० ट्रक मालसामान वीरगञ्ज नाकाबाट भित्रिने गरेको रसाइलीले बताउनुभयो ।

भारतले नेपालतर्फ धान र चामलको निर्यात खुल्ला गरे लगत्तै यो नाकाबाट धान चामल भित्रिन सुरु भएको वीरगन्ज भन्सार कार्यालयका सूचना अधिकृत दिल्ली सुवेदीले जानकारी दिनुभयो ।

वीरगन्ज उद्योग वाणिज्य संघका अध्यक्ष एवम् नेपाल चामल दाल तेल उद्योग संघका केन्द्रीय अध्यक्ष सुबोधकुमार गुप्ताले भारतले नेपालका लागि यस वर्ष ६ लाख मेट्रिक टन मात्र धान चामलको निर्यात फुकुवा गरेकाले व्यवसायीले हतारमा धान चामल आयात गरिरहेको बताउनुभयो ।

क्याटेगोरी : समाचार
ट्याग : #धान–चालम, #धान–चालमको आयात बढ्यो

---

---

---