काठमाडौं । राजेन्द्र लिङदेन नेतृत्वको राष्ट्रिय प्रजातन्त्र पार्टीले काठमाडौंका १० वटै निर्वाचन क्षेत्रको उम्मेदवार टुंग्याएको छ । निर्वाचन आयोगमा मनोनयन दर्ता गर्नु एकदिन अघि काठमाडौं जिल्लाको १० वटै निर्वाचन क्षेत्रमा उम्मेवारी टुंग्याएको हो ।

राप्रपाको यो निर्णयपछि गायक संजय श्रेष्ठले राप्रपा छाडेको घोषणा गरेका छन् । उनले संसदीय चुनावको टिकट वितरणमा असन्तुष्टि जनाउँदै पार्टी छाडेको फेसबुक स्टाटसमार्फत जनाएका छन् ।

उनले स्टाटसमै स्वतन्त्र उम्मेदवारी दिने पनि बताएका छन् । उनले लेखेका छन्, ‘भोलि म आफू पनि स्वतन्त्र रुपमा मनोनयन पत्र दाखिल गर्दैछु । राप्रपालाई यदि म जस्तो व्यक्तिको यदि आवस्यकता छैन भने मेरो भन्नु केही छैन, म आफैँ राप्रपा छोडेको घोषणा गर्दैछु र म जस्ता हजारौंले आउने दिनमा यही क्रम दोहोर्‍याउने छन् । भोलिको दिनमा के हुन्छ भन्न सकिन्न ।’

स्वतन्त्रबाट चुनाव लड्ने घोषणा गरेको उनले अध्यक्ष राजेन्द्र लिङ्देनले आफूलाई पहिले नै टिकट दिने प्रतिबद्धता जनाएको तर वचन पुरा नगरेको पनि जनाएका छन् ।

क्याटेगोरी : समाचार
ट्याग : #संजय श्रेष्ठले टिकट नपाए पछि गरे विद्रोह

---

---

---