पाँचथरबाट प्रतिनिधिसभा सदस्यको उम्मेदवारका लागि वसन्तकुमार नेम्वाङ सिफारिस

साझा पाना २०७९ भदौ १९ गते १५:२५ मा प्रकाशित

पाँचथर । नेकपा एमाले पाँचथरबाट प्रतिनिधिसभा सदस्यको उम्मेदवारका लागि वसन्तकुमार नेम्वाङ सिफारिस भएका छन् ।

प्रतिनिधिसभाको एक मात्रै क्षेत्र रहेको पाँचथरमा एमालेको तर्फबाट नेम्वाङ सर्वसम्मतले सिफारिस भएका हुन् ।

आइतबार बसेको एमाले पाँचथरको छैटौँ जिल्ला कमिटीको बैठकले नेम्वाङलाई सिफारिस गर्ने निर्णय गरेको हो । पूर्वमन्त्रीसमेत रहेका नेम्वाङ पार्टीको केन्द्रीय कमिटी सदस्य तथा पाँचथर जिल्ला इन्चार्ज समेत हुनुहुन्छ ।

यस्तै नेकपा (एमाले)ले पाँचथर प्रदेशसभा निर्वाचन क्षेत्र नं. क का लागि प्रत्यक्षतर्फ पार्टीका जिल्ला अध्यक्ष राजकुमार भण्डारीलाई उम्मेदवार बनाउने निर्णय गरेको छ ।

फिदिममा सम्पन्न भएको प्रदेशसभा निर्वाचन क्षेत्र समन्वय कमिटीको पूर्ण बैठकले सहमतिमा भण्डारीलाई उम्मेदवार बनाउने निर्णय गरेको हो ।

प्रदेशसभा निर्वाचन क्षेत्र नं. ख का लागि भने छलफल भइरहेको पार्टीका जिल्ला उप–सचिव पृथ्वी लावतीले जानकारी दिनुभयो ।

क्याटेगोरी : समाचार
ट्याग : #नेकपा एमाले पाँचथर, #पाँचथरबाट प्रतिनिधिसभा सदस्यको उम्मेदवारका लागि वसन्तकुमार नेम्वाङ सिफारिस, #वसन्तकुमार नेम्वाङ