अब अनलाइनबाटै मतदाता नामावली दर्ता गर्न सकिने

साझा पाना २०७९ असार २९ गते १२:४० मा प्रकाशित

काठमाडौँ । अब अनलाइनबाटै मतदाता नामावली दर्ता गर्न सकिने भएको छ ।

निर्वाचन आयोगले वुधबारदेखि अनलाइनबाट मतदाता नामावली दर्ता गर्न सकिने व्यवस्था मिलाएको हो । आयोगले एक विज्ञप्तिमार्फत फोटो सहितको मतदाता नामावली दर्ता अनलाइनबाट गर्न सकिने उल्लेख गरेको छ ।

आयोगले ‘वेबबेस्ट भोटर लिस्ट प्रि–रजिस्ट्रेसन सिस्टम’ तयार गरेर काठमाडौं उपत्यकाका ३ जिल्ला (काठमाडौं, भक्तपुर र ललितपुर) सेवा सुरु गरिएको जनाएको छ ।

फोटोसहितको मतदाता नामावलीमा हालसम्म नाम दर्ता नगरेका नेपाली नागरिकले अनलाइनबाट फाराम भर्न चाहेमा निर्वाचन आयोगको वेबसाइटमा गई व्यक्तिगत विवरण भरि जिल्ला निर्वाचन कार्यालयमा अनलाइनबाटै आवेदन पेश गर्न सक्नेछन् ।

त्यसपछि अनलाईन फाराममा उल्लिखित संकेत नम्बरसहितको प्रिन्ट कपी र आवश्यक अन्य प्रमाण कागजात लिएर फोटो खिच्न र औँठाछाप दिन सम्बन्धित जिल्ला निर्वाचन कार्यालयमा सम्पर्क राख्नु पर्ने आयोगका प्रवक्ता शालिग्राम शर्मा पौडेलले जनाएका छन् ।

क्याटेगोरी : समाचार
ट्याग : #निर्वाचन आयोग, #मतदाता नामावली दर्ता