तीन दिन पछि खुल्यो पहिरोले अवरुद्ध माम्लिङ–पिलुवा खोला सडक

साझा पाना २०७८ असार २३ गते २०:१६ मा प्रकाशित

राष्ट्रिय गौरवको जोगमुनी—किमाथाङ्का कोशी राजमार्ग अन्तर्गत सङ्खुवासभाको धर्मदेवी नगरपालिका–४ मा रहेको माम्लिङ–पिलुवा खोला सडक खण्ड तीन दिनपछि सञ्चालनमा आएको छ ।

पहिरो खसेर बन्द भएको सडक खण्डको पहिरो पन्छाएपछि बुधवार बेलुकी साढे पाँच बजेपछि दुवैतर्फी सञ्चालनमा आएको सडक डिभिजन कार्यालय तुम्लिङटारका प्रमुख गौतमकुमार श्रेष्ठले बताउनुभयो । उहाँका अनुसार एक्स्काभेटरले पहिरो पन्छाएर र ब्रेकरले ढुङ्गा फुटाएर सडक खोलिएको हो । बुधवार पानी पर्ने क्रम अलि रोकिएपछि पहिरो पन्छाउन र ढुङ्गा फुटाउन सहज भएको सडक डिभिजन कार्यालय तुम्लिङटारका प्रमुख श्रेष्ठको भनाइ छ ।

यता जोगमुनी—किमाथाङ्का कोशी राजमार्ग अन्तर्गत नै मकालु गाउँपालिकाको नुम—फ्याक्सिन्दा दोभान सडक खण्डको पहिरो भने अझै पन्छाउन नसकिएको उहाँले बताउनुभयो ।

अविरल वर्षाका कारण सोमवार कोशी राजमार्ग अन्तर्गत सङ्खुवासभाको दुई ठाउँमा सडक खण्ड पहिरोका कारण बन्द भएको थियो । विराटनगर हुँदै धरान—धनकुटा भएर सङ्खुवासभामा भित्रिने कोशी राजमार्ग मुख्य सडक खण्ड हो ।

क्याटेगोरी : समाचार
ट्याग : #संखुवासभा