काष्ठमण्डप पुनःनिर्माणको काम ९० प्रतिशत सकियो ,आगामाी वैशाखमा काष्ठमण्डपको नयाँ स्वरुप देख्न पाइने

साझा पाना २०७७ चैत्र २ गते १२:४१ मा प्रकाशित

काठमाडौं । काष्ठमण्डप पुनःनिर्माणको काम ९० प्रतिशत सम्पन्न भएको छ । आगामी वैशाख महिनामा नै सक्ने गरी तीव्ररूपमा निर्माण कार्यं भइरहेको छ ।

विसं २०७२ को भूकम्पले पूर्णरूपमा क्षति पुगेको ऐतिहासिक काष्ठमण्डप पुनःनिर्माणको काम तीन वर्षअघि शुरु गरिएको थियो । शुरुवाती चरणमा निर्माका सामाग्रीहरु समयमै उपलब्ध गराउन नसक्दा काम ढिला भएको तर अहिले तिब्र रुपमा काम भइरहेको बताइएको छ ।

निर्माणका लागि अहिले दैनिक ३५ कामदार नियमित रूपमा खटिइरहेका छन् । काष्ठमण्डप पुनःनिर्माण समितिका अध्यक्ष राजेश शाक्यका अनुसार १० प्रतिशत बाँकी काम यो महिनाभित्रै सकिने र आगामी वैशाखमा पुनःनिर्मित काष्ठमण्डप देख्न पाइन्छ ।

यस ऐतिहासिक सम्पदा काष्ठमण्डप पुनःनिर्माणका लागि रु १९ करोड खर्च लाग्ने अनुमान गरिएकामा काठमाडौँ महानगरपालिकाले पुनःनिर्माण समितिलाई चरणबद्धरूपमा आर्थिक सहयोग गरेको छ । पुनःनिर्माणका लागि केही काठ पुरानै प्रयोग भएता पनि नयाँ काठ भने टिम्बर कर्पोरेसन अफ नेपालसँग लिखित सम्झौता गरी आवश्यकतानुरूप चरणबद्ध रुपमा ल्याइएको समितिले बताएको छ ।

क्याटेगोरी : समाचार, स्थानीय
ट्याग : ##९० प्रतिशत, ##काष्ठमण्डप पुनःनिर्माण