लाइडर गन मार्फत चेकजाँच तीब्र : ३५ वटा सवारीसाधन कार्वाहीमा

प्रनिश थापा चितवन संवाददाता २०७७ असोज २९ गते १६:०६ मा प्रकाशित

चितवन । जिल्ला ट्राफिक प्रहरी कार्यालय चितवनले अत्याधुनिक लाइडर गन मार्फत तीब्र गतीमा सवारी चलाउने ३५ वटा सवारी साधनलाई कारबाही गरेको छ ।

सडकमा बढ्दै गएकाे सवारी चाप र तीव्र गतिका कारण हुन सक्ने सवारी दुर्घटनाकाे जाेखिमलाई न्युनीकरण गर्ने उद्देश्यले आँपटारी जंगलमा अत्याधुनिक लाइडर गन मार्फत ट्राफिक चेकजाँच गरिएको हो । सवारी चेकजाँचका क्रम्मा तीव्र गतिमा सवारी चलाउने ३५ जना सवारी चालकहरूलाई फाेटाे/ भिडियाे र स्पिड भ्वाइलेन्सकाे प्रिन्ट प्रति सहित कारबाही एवं सचेतना गराएर छाडिएको जिल्ला ट्राफिक प्रहरी कार्यालय चितवनका प्रमुख दयाकृष्ण भट्टले जानकारी दिए ।

भट्टका अनुसार कार्वाहीमा परेका सवारीहरू ९६ किमी प्रतिघण्टा सम्मकाे गतिमा कुदेका भेटिएका थिए । यसअघि ट्राफिक प्रहरीले हिजो बुधबार दिउँसाे साँढे १२ बजेदेखी साँढे तीन बजेसम्म टिकाैली जंगलमा चेेेकजाँच गरेको थियो । अधिकाशं गम्भीर प्रकृतिकाे दुर्घटना तीव्र गतिका कारण हुने भएकोले सडकमा राखिएका स्पीड लिमिट सन्देशमुलक बाेर्डहरुकाे संवेदनशीलता बुझेर मात्रै सवारी चलाउन जिल्ला ट्राफिक प्रहरी कार्यालय चितवनका प्रमुख दयाकृष्ण भट्टले सबैमा अपिल गरेका छन् ।

अत्याधुनिक लाइडर गन मार्फत कारबाही अभियान सुरु गराउन चितवनका ट्राफिक प्रहरी प्रमुख आफैं फिल्डमा खटिएका छन् । जिल्लामा नै पहिलाेपटक बागमती प्रदेश ट्राफिक प्रहरी कार्यालय रामनगर चितवनले उपलब्ध गराएको उक्त लाइडर गनको मूल्य अहिले नेपालमा १२ लाख पर्छ । राजधानी बाहिर यो गन पहिलोपटक चितवन ट्राफिक प्रहरीले सेवामा ल्याईएको हो ।