मन्त्री ढकालद्धारा प्यूठानमा स्वास्थ्य सामाग्री प्रदान

साझापाना २०७७ असोज १ गते २१:३४ मा प्रकाशित

काठमाडौँ १ असोजः स्वास्थ्य तथा जनसंख्या मन्त्री भानुभक्त ढकालले कोरोना भाइरस (कोभिड १९)को रोकथाम र नियन्त्रणका लागि प्यूठान जिल्लाका लागि स्वास्थ्य सामाग्री प्रदान गर्नु भएको छ ।

आज मन्त्रालयमा आयोजित कार्यक्रममा मन्त्री ढकाल र प्रधानमन्त्री केपी शर्मा ओलीका प्रेस सल्लाहकार सूर्य थापाले प्युठान नगरपालिका प्रमुख अर्जुनबहादुर कक्षपति तथा भिग्री प्राथमिक स्वास्थ्य केन्द्रका डा राजेन्द्र पौडेललाई पाँच थान भेन्टिलेटर र स्वास्थ्य सामाग्री हस्तान्तरण गर्नुभयो ।

पाँचवटामध्ये दुई वटा प्यूठान जिल्ला अस्पतालमा, दुई वटा भिग्री प्राथमिक स्वास्थ्य केन्द्र, र एक वटा खलंगा प्राथमिक स्वास्थ्य केन्द्रमा जडानका लागि भेन्टिलेटर हस्तान्तरण गरिएको हो ।

३ हजार सर्जिकल मास्क, एन ९५ मास्क २७० थान, १० थान थर्मलगन र एक हजार थान पन्जा लगायतका स्वास्थ्य सामाग्री रहेका छन । प्रधानमन्त्रीका प्रेस सल्लाहकार थापाको पहलमा प्यूठानका उक्त सामाग्री उपलब्ध भएको हो ।

सोही अवसरमा मन्त्री ढकालले कोभिड १९ को लडाईमा सवै एकजुट हुनुपर्ने बताउनुभयो ।

प्यूठानमा अहिलेसम्म कोभिड १९ को उपचारका लागि भेन्टिलेटर थिएन ।

यस्तै मन्त्री ढकालले लुम्बिनी प्रादेशिक अस्पतालमा दुई थान भेन्टिलेटर, त्रिवि शिक्षण अस्पताल पाँच थान भेन्टिलेटर, दमक अस्पतालमा तीन वटा भेन्टिलेटर, इलाम जिल्ला अस्पतालमा दुइ वटा भेन्टिलेटर, तेह्रथुम जिल्ला अस्पतालमा एक थान भेन्टिलेटर हस्तान्तरण गर्नुभयो । रासस