विश्वकपको रौनक चलिरहँदा फिफाद्वारा नेपाली फुटबल निलम्बन

साझा पाना २०८३ असार ११ गते १०:३५ मा प्रकाशित

विश्वभर फिफा विश्वकप–२०२६ को रौनक चलिरहँदा नेपाली फुटबल भने निलम्बनमा परेको छ ।

विश्व फुटबल महासङ्घ (फिफा)ले अखिल नेपाल फुटबल सङ्घ (एन्फा) मा सरकारको हस्तक्षेप भएको भन्दै एन्फालाई अनिश्चित कालिन प्रतिबन्ध लगाएको हो ।

फिफाले बुधबार जारी गरेको पत्रमा नेपाललाई निलम्बन गरिएको उल्लेख छ । निलम्बनसँगै नेपालले फिफाबाट पाउँदै आएको अनुदान रोक्ने जनाएको छ । नेपालले फुटबल विकासका लागि फिफाबाट वार्षिक एक अर्बभन्दा बढि रकम अनुदान सहयोग पाउँदै आएको थियो ।

फिफाको अनुसार निलम्बनमा परेसँगै नेपालले अन्तर्राष्ट्रिय फुटबल तथा युथ फुटबल खेल्न नपाउनुका साथै पदाधिकारीको विदेश भ्रमण समेत रोक्का हुनेछ ।

एन्फामा अध्यक्ष पंकजविक्रम नेम्वाङ नेतृत्वको चार वर्षे कार्यकाल यही असार ५ गते सकिएको थियो । तर, नेम्वाङ पक्षले यसअघि पाँच महिनाअघि नै अर्ली इलेक्सन गर्ने निर्णय गरेपछि नेपाली फुटबल विवादको घेरामा परेको थियो ।

एन्फा नेतृत्वले राष्ट्रिय खेलकुद परिषद् (राखेप) र अदालतको समेत अवज्ञा गर्दै अर्ली इलेक्सनको तयारी गरेपछि गत चैतमा राखेपले पनि एन्फालाई तीन मिहना प्रतिबन्धका् कारबाही गरेको थियो ।

तर, राखेपले दुई महिनापछि तहगत निर्वाचन गर्नका लागि एन्फाको निलम्बन फुकुवा गरेको थियो । एन्फाले तहगत निर्वाचन गर्ने तयारी नगरेपछि एन्फा पुन: राखेपको तारो बनेको थियो ।

यहीबिच फिफाले एन्फालाई अनिश्चित कालीन निलम्बन गरेको हो । राखेप र अख्तियार दुरुपयोग अनुसन्धान आयोगले समेत एन्फामा आर्थिक अनियमितता भएको भन्दै छानविन गरिरहेको थियो ।

आर्थिक अनियमितताको छानबिनका लागि राखेपको सिफारिसमा अध्यागमन विभागले समेत एन्फा अध्यक्ष नेम्वाङ र महासचिव किरण राईलाई फिफा विश्वकप–२०२६ को उद्घाटन सत्रमा सहभागिता जनाउन गत जेठ २६ गते मेक्सिको जान लाग्दा अध्यागमन विभागले त्रिभुवन अन्तर्राष्ट्रिय विमानस्थलबाटै फर्काइदिएको थियो ।

क्याटेगोरी : खेलकुद
ट्याग : #breaking, #विश्वकपको रौनक चलिरहँदा फिफाद्वारा नेपाली फुटबल निलम्बन