काठमाडौं। इरान सरकारको एक उच्चस्तरीय प्रतिनिधिमण्डलले शनिबार पाकिस्तानका प्रधानमन्त्रीसँग भेट गर्दै मध्यपूर्वमा जारी तनाव अन्त्य गर्ने सम्भावनाबारे छलफल गरेको छ। उक्त वार्ता अमेरिकी पक्षसँग हुन सक्ने सम्भावित संवादका सर्तहरूमा केन्द्रित रहेको बताइएको छ। अमेरिकी टोलीको नेतृत्व उपराष्ट्रपति जेडी भान्सले गरेका छन्।

इस्लामावादस्थित सेरेना होटलमा वार्ता चलिरहँदा इरानी सञ्चारमाध्यमहरूले प्रधानमन्त्री शहबाज शरीफसँगको भेटपछि इरानले अमेरिकासँग प्रत्यक्ष वार्ता गर्ने वा नगर्ने भन्ने निर्णय लिने जनाएको छ।

यसअघि इरानले कुनै पनि दीर्घकालीन शान्ति सम्झौताका लागि केही सर्तहरू अघि सारेको थियो। तीमध्ये रोक्का गरिएको इरानी सम्पत्तिको फुकुवा र लेबनानमा हेजबुल्लाहमाथि इजरायलले गरिरहेको सैन्य कारबाही अन्त्य प्रमुख छन्। तर अमेरिकी उपराष्ट्रपति भान्सले इस्लामाबादमा भइरहेको वार्तामा इरानी सम्पत्ति फुकुवाको विषय समावेश नहुने स्पष्ट पारेका छन्।

इरानी प्रतिनिधिमण्डलको नेतृत्व संसदीय सभामुख मोहम्मद बाघेर गालिबाफले गरेका छन्। पाकिस्तानका सेना प्रमुख असिम मुनिरले उक्त टोलीलाई स्वागत गरेका थिए। त्यसपछि दुवै पक्ष वार्ता स्थलतर्फ गएका थिए।

यसैबीच, अमेरिकी उपराष्ट्रपति भान्सलाई नुर खान हवाई अड्डामा विशेष सम्मानका साथ स्वागत गरिएको थियो। स्वागत कार्यक्रममा अमेरिकी विशेष दूत स्टिभ विटकोफ र राष्ट्रपति डोनाल्ड ट्रम्पका ज्वाइँ जारेड कुश्नर पनि उपस्थित थिए।

यद्यपि, सम्बन्धित पक्षहरूबीच अझै पनि केही प्रमुख मुद्दामा ठूलो मतभेद कायम रहेको देखिन्छ। प्रतिबन्ध, लेबनानमा युद्धविरामको कार्यान्वयन, र रणनीतिक स्ट्रेट अफ हर्मुज खुला राख्ने विषयमा सहमति टाढा देखिएको छ। साथै, वार्ताका क्रममा आपसी अविश्वास पनि स्पष्ट रूपमा देखिएको बताइएको छ।

क्याटेगोरी : अन्तर्राष्ट्रिय
ट्याग : #breaking, #इरानी प्रतिनिधिमण्डल र पाकिस्तानी प्रधानमन्त्रीबीच भेटवार्ता

---

---

---