फोहर व्यवस्थापनका लागि सरकारको भरपर्ने हो भने मेयर शाह असफल निश्चित: योगेश भट्टराई

साझापाना २०७९ साउन २९ गते १४:०३ मा प्रकाशित

काठमाडौं । नेकपा एमालेका नेता तथा सासंद योगेश भट्टराईले काठमाडौं महानगरपालिकाका मेयर बालेन शाहलाई सरकारको भरपर्ने हो भने असफल हुने निश्चित भएको बताए ।
उनले आइतबार संसदमा बोल्दै काठमाडौं महानगरपालिकाका मेयर बालेन शाहलाई एमालेसँग फोहोर व्यवस्थापनको भिजन भएको भन्दै त्यस काममा एमालेले पूर्ण क्षमताका साथ सहयोग गर्न तयार रहेको पनि बताए ।

‘म काठमाडौंका मेयर बालेन शाहलाई भन्न चाहन्छु, ठोस् प्रस्तावसहित आउनुस् नेकपा एमालेसँग त्यो भिजन छ, त्यो दृष्टिकोण छ । नेकपा एमाले पूर्ण क्षमताका साथ तपाईलाई सहयोग गर्न तयार छ । यदी तपाई सरकारको भरपर्नुभयो भने तपाई असफल हुने निश्चित छ । काठमाडौंको बरबादी हुनेछ, सांस्कृतिक सहर काठमाडौंलाई सबै मिलेर रक्षा गरौं।’
उनले ७१ दिनसम्म पनि काठमाडौंको फोहोर नउठेको भन्दै यस विषयमा सरकारले पनि केही पहल नगरेको आरोप लगाए ।

यसअघि काठमाडौंको फोहोर १४ दिनसम्म नउठेको इतिहास छ, आज ७१ दिन भयो प्रधानमन्त्रीबाट केही पहल भएको छैन् । सम्बन्धित मन्त्रीहरू बेखबर छन्, त्यस्तै झाडापखाला, हैजा लगायत काठमाडौंमा फोहोरले काठमाडौं नै गनाउने अवस्थामा पुगेको छ । यो सरकारले कुनै पहलकदमी गर्न सक्दैन। यो सरकारको हुती पनि छैन। त्यसैले म सरकारको ध्यानाकर्षण आज म गर्दिन ।
फोहोर व्यवस्थापनको विषयमा काम गर्ने सरकारको हुती नभएको भन्दै उनले काठमाडौंका मेयर बालेन शाहालाई एमालेसँग मिलेर काम गर्न आग्रह पनि गरे ।

क्याटेगोरी : समाचार
ट्याग : #काठमाडौँं महानगरपालिका, #योगेश भट्टराई