समाचार

लाङटाङमा मोटरबाटो निर्माणको कार्ययोजना स्वीकृत

पर्यटकीय क्षेत्र लाङटाङमा मोटरबाटो निर्माणको कार्य योजना स्वीकृत भएको छ ।

आइतबार सम्पन्न गोसाइँकुण्ड गाउँपालिकाको तेस्रो गाउँसभाले शेर्पागाउँ, लामाहोटेल, घोडातबेला, हुँदै लाङटाङ गाउँको नजिक थाङसाप भन्ने स्थानसम्म मोटरबाटो निर्माण गर्न कार्य योजना स्वीकृत गरेको र आगामी आर्थिक वर्षमा मोटरबाटो निर्माण सम्पन्न हुने गोसाइँकुण्ड गाउँपालिकाले जनाएको छ ।

दैनिकरुपमा ३० देखि ४० जना स्थानीयवासी आन्तरिक एवं बाह्य पर्यटक ओहोरदोहोर गर्ने उक्त मार्गमा धुञ्चेबाट क्याङजेन पुग्न तीन दिन लाग्ने र मोटरबाटो निर्माण भएपछि काठमाडौँदेखि क्याङजेनसम्म एक दिनमै पुग्न सकिने भएकाले यो मार्गलाई महत्वका साथ प्राथमिकता दिएको बताइएको छ ।

गाउँपालिकाका अध्यक्ष कैसाङ नुर्पु तामाङकाअनुसार हिमाली प्रकृतिको छटा अवलोकन गर्न जाँदा पर्यटक बिरामी परेमा प्रतिकूल मौसमले हेलिकप्टर जान नसक्ने अर्काेतर्फ समुद्री सतहबाट तीन हजार ४०० देखि तीन हजार ९०० मिटर उचाइ क्यङजेनसम्म दैनिक उपभोग्य वस्तु र पर्यटकीय सामग्रीका साथै विकास निर्माणको सामग्री ढुवानीमा असहज भएका कारण स्थानीयवासीको चाहना र पर्यटकको हितका लागि मोटरबाटो निर्माण गर्न लागिएको हो ।

लाङटाङ क्षेत्रमा अधिकांश निर्माण सामग्री हेलिकप्टरबाट ढुवानी गर्नुपरेको वास्तविक समस्या र लाङटाङमा बसोबास गर्ने ११६ घर परिवारको चाहनालाई सम्बोधन गर्दै स्थानीय सरकारले जनचाहना पूरा गर्न लागेको बताउँदै लाङटाङ पुनःनिर्माण एवं व्यवस्थापन समितिका अध्यक्ष तेम्बा लामाले मोटर बाटो निर्माणको कार्ययोजना स्वीकृतबाट स्थानियवासी खुशी भएको बताउनुभयो ।

यस्तै धुञ्चे गोसाइँकुण्ड केबुलकार निर्माणको कार्य योजना पनि गाउँसभाले स्वीकृत गरेको छ । प्रारम्भिक सर्वेबाट केबुलकारको दूरी सात किमी कायम भएको बताउँदै गापा अध्यक्ष तमाङले धुञ्चे गोसाइँकुण्ड केबुलकारको विस्तृत अध्ययन प्रतिवेदन एवं डिपिआर तयार गर्न ३ नं प्रदेश सरकारले समेत बजेट विनियोजन गरिसकेकाले अब छिट्टै केबुलकार निर्माण हुने बताउनुभयो ।
यसैगरी गाउँसभाले विश्वमा दुलर्भ रहेको रेडपाण्डा हाबे्र नामक पार्क निर्माण पर्यटकीय पूर्वाधार निर्माण, ट्राउट माछा प्रवद्र्धन, तीन वटा ठाडो खोलामा जलविद्युत् निर्माणको अध्ययन, कृषि र पशुपालन क्षेत्रमा प्रोत्साहन, हिमाली क्षेत्रमा पदयात्रा गर्ने पर्यटकको सुरक्षाका लागि पर्यटकीय मार्गमा जिपिएसमा आधारित उपकरण जडान गर्नेजस्ता नयाँ र महत्वकांक्षी कार्ययोजनासमेत स्वीकृत गरेको छ ।

सम्बृद्ध रसुवा निर्माण गरी हिमाली क्षेत्रका बासिन्दाको समस्या हल गर्ने र पर्यटन प्रवद्र्धन गर्ने खालका नीति तथा कार्यक्रम आएकोमा रसुवा नागरिक समाजले स्वागत गरेको छ ।

गोसाइँकुण्ड गाउँपालिका तेस्रो गाउँसभाले आव २०७५÷७६ का लागि विभिन्न शिर्षकमा रु २० करोड १५ लाख २६ हजार वार्षिक बजेटसमेत विनियोजन गरेको गाउँपालिका उपाध्यक्ष कारग्याल्मो श्रेष्ठले बताउनुभयो ।

Tags
Show More

Related Articles