सातदोबाटो–चापागाउँ सडकको एकएक हिसाब खोज्दै स्थानीय

साझापाना २०७६ कात्तिक १७ गते ०४:०५ मा प्रकाशित

काठमाडौं, १७ कात्तिक । ललितपुर जिल्लाको सातदोबाटो हुँदै हेटौंडा जाने कान्तिलोकपथ सडक निर्माण नहुँदा स्थानीयले हैरानी भोग्नु परेको छ ।

भत्किएको सडकको हिलो र धुलोले चापागाउँ, ठेचो र सुनाकोठीको सडक हिँड्नै नसकिने गरी बिग्रिएको छ । सडक बिग्रिएको वर्षौं भइसक्दा पनि सरोकारवाला निकायले सडक बनाउने वा मर्मत गर्ने विषयमा ध्यान दिएका छैनन् । ठेकेदार र सो क्षेत्रका जनप्रतिनिधिहरू पनि कानमा तेल हालेर बसेका छन् । उनीहरूले स्थानीय जनताको मागको सुनुवाइ समेत गरेका छैनन् ।

धुलोका कारण स्थानीयलाई समस्या भएपछि गोदावरी नगरपालिकाले बाटोमा बेलाबेला ट्यांकरबाट पानी हाल्ने गरेको छ । धुलो नउडोस् भनेर हाल्ने पानीका कारण सडकमा चिप्लिएर दैनिक ५० भन्दा बढी मोटरसाइकल लड्ने गरेको स्थानीयले बताएका छन् ।

तीन महिना अगाडि ललितपुर जिल्लाका प्रतिनिधि सभाका सांसद पम्फा भुसाल, नवराज सिलवाल, प्रदेश सांसद चेतनाथ सन्जेल, ललितपुरका प्रमुख जिल्ला अधिकारी, सडक डिभिजन प्रमुख र ठेकदारबीच कात्तिक मसान्तसम्म यथास्थितिमा कालोपत्र गर्ने लिखित सहमति भएको थियो । कात्तिक मसान्त सक्किने बेला भइसक्यो । तर, सरोकारवाला निकायले सडक अहिलेसम्म सिन्को पनि भाँचेको छैन ।

कात्तिक मसान्तसम्म पनि सडक कालोपत्र नहुने देखेपछि सयौँ स्थानीयहरूको भेलाले रामभक्त महर्जनको संयोजकत्वमा २५ जनाको संघर्ष समिति गठन गरेको छ । संघर्ष समितिले सडक बनाउन दवाव दिँदै आएको छ ।

समितिले गोदावरी नगरपालिकालाई पनि सडक बनाउन केन्द्र सरकारलाई दवाव दिन आग्रह गरिसकेको छ ।

सडकको दुरदशाबाट जानकार प्रदेश सांसद चेतनाथ सन्जेल भने सरोकारवाला निकायलाई दवाव दिएर सडक मर्मत र सुधार गर्नेभन्दा पनि स्थानीयले राजनीति गर्न थालेको भन्दै आक्रोश पोखेका छन् । त्यही क्षेत्रका जनताको भोटले प्रदेश सांसदमा निर्वाचित सञ्जेलले आफूलाई जनताको मागभन्दा टाढा राख्न खोजेपछि स्थानीयहरू आक्रोशित बनेका छन् ।

क्याटेगोरी : विशेष
ट्याग : #सातदोबाटो–चापागाउँ सडक