किन रोज्यो नेकपाले २३ गतेको सभामा नारायणहिटी दरबार ?

साझापाना २०७७ माघ २१ गते १६:४४ मा प्रकाशित

नेपाल कम्प्युनिष्ट पार्टी (नेकपा) ले ठूला सभा गर्दा राजधानीको यातायात व्यवस्था अस्तव्यस्त हुने समस्याबाट मुक्त हुन २३ गतेको सभा नारायणहिटी दरबार संग्रहालयको दक्षिण प्रवेशद्वार अगाडी गर्न लागेको स्पष्ट पारेको छ ।

आज आयोजित भेला तयारी सम्बन्धी कार्यक्रममा बोल्दै नेकपाका वागमती प्रदेश अध्यक्ष आनन्द पोखरेलले यातायात व्यवस्थालाई सुचारु राख्न र भेलामा उपस्थित हुने करिब २ लाख सहभागी संख्यालाई हेरेर उक्त स्थान छानिएको जानकारी दिनुभयो । ‘गुगल म्याप सर्च गर्दा र इन्जिनियर सहित विभिन्न ठाउँमा हेर्दा यसअघि राजधानीमा सभा गरिने ठाउँमा भन्दा त्यहाँ सर्वाधिक मानिस अट्न सक्ने देखियो ।’ उहाँले भन्नुभयो ।

ठूला सभाका लागि विगतको चर्चित स्थान खुल्लामञ्चमा बस पार्क राखिएका कारण राजनीतिक सभाहरु अहिले रत्नपार्क, भृकुटीमण्डप, माइतिघर मण्डला आदि स्थानहरुमा हुने गरेका छन् । ‘यि स्थानहरुमा बढीमा २० हजार मात्र अट्न सकिने देखियो’, उहाँले थप्नुभयो ।

सभाका लागि नारायणहिटी दरबार संग्रहालयको उक्त स्थान छनौट गरिएपछि सामाजिक सञ्जालमा विभिन्न टिप्पणी सुरु भएको भन्दै उहाँले यसलाई लिएर आधारहीन हल्लाहरु पनि फैलाइएको बताउनुभयो । ‘त्यस्तो भन्नेहरुले नारायणहीटी अब दरबार नभएर दरबार संग्रहालय भइसकेको बिर्सिए’।

सत्तारुढ पार्टीबाट सभा आयोजना हुनु अस्वभाविक भनेको कुरा उठाउँदै उहाँले आफ्नो दल निर्वाचनमा जाँदै गरेकोले यस्ता सभा अझ अरु पनि गरिने बताउनुभयो । कार्यक्रममा पार्टीका प्रेस इन्चार्ज राजेन्द्र गौतम र प्रेस संगठन नेपालका संयोजक गणेश बस्नेतले पनि सम्बोधन गर्नुभएको थियो ।

क्याटेगोरी : राजनीति
ट्याग : #नेकपाले २३ गतेको सभामा