‘घुमौँ मधेस, बुझौँ मधेस’ कार्यक्रम सम्पन्न

साझा पाना २०८२ असार २५ गते ०८:४७ मा प्रकाशित

जीवनराज दाहाल : जनकपुरधाम, असार २५

“हामीले अन्तरक्रिया कार्यक्रम सक्यौँ, तर यो ठाउँको प्रचारप्रसार अभियान र पर्यटन क्षेत्रलाई व्यवस्थित गर्ने काम अझै बाँकी नै छ,” होटल तथा पर्यटन व्यवसायी महासंघ मधेश प्रदेशका अध्यक्ष हिरा गौतमले कार्यक्रम समापन गर्दै भन्नुभयो ।

उद्योग, वाणिज्य तथा पर्यटन मन्त्रालयको सहकार्यमा महासंघले आयोजना गरेको ‘पर्यटन प्रचार-प्रसार तथा अन्तरक्रिया कार्यक्रम’यही असार २४ गते जनकपुरधाममा सम्पन्न भएको हो । मधेश प्रदेशका मुख्यमन्त्री सतिशकुमार सिंहले कार्यक्रमको उद्घाटन गर्दै पर्यटनमार्फत प्रदेशको समृद्धि सम्भव भएको बताउनुभयो ।

“मधेशमा रहेका ऐतिहासिक स्थलहरूको प्रचारप्रसार गर्न सकिएमा लाखौँ पर्यटक यसतर्फ आकर्षित हुन सक्छन्,” उहाँले भन्नुभयो, “मिथिला र अयोध्याबीचको सांस्कृतिक सम्बन्धलाई ध्यानमा राख्दै अयोध्या आउने पर्यटकलाई जनकपुरधाम ल्याउने पहल आवश्यक छ ।”

जनकपुरधाम उद्योग वाणिज्य संघका अध्यक्ष सुरेन्द्र भण्डारीले भिट्टामोड जस्ता क्षेत्रहरूमा पर्यटकसँग दुर्व्यवहार भइरहेकोप्रति चिन्ता व्यक्त गर्नुभयो । “हामी पर्यटन प्रवर्द्धनको कुरा गरिरहेका छौं, तर कतै पर्यटक कुटिन्छन् भने त्यो हाम्रो आतिथ्य संस्कृतिका लागि धक्का हो,” उहाँले भनुभयो, “दुर्व्यवहार गर्नेप्रति कडा कारबाही हुनुपर्छ ।”

कार्यक्रमकै अवसरमा होटल तथा पर्यटन व्यवसायी संघ, धनुषा जिल्लाको नयाँ नेतृत्व पनि चयन गरिएको छ । सर्वसम्मत निर्णयबाट रुपेश सिंह संघको अध्यक्षमा चयन हुनुभएको छ ।

मुख्यमन्त्री सिंहले बाहिरबाट आउने पाहुनालाई स्वागत सत्कारमा कहिल्यै कन्जुसी गर्न नहुने उल्लेख गर्दै मधेशको पर्यटन विकासको ढोका अब खुल्न थालेको संकेत दिनुभयो ।

उक्त कार्यक्रम धनुषाको जनकपुरस्थित वेलकम होटलमा सम्पन्न भएको थियो ।