संसदमा सांसद शाहीको कविता : दुई नौजवान युवाको सपना बालकुमारीमै उडाइदियौ

साझा पाना २०८० फागुन १३ गते १५:१० मा प्रकाशित

काठमाडौं, १३ फागुन । राष्ट्रिय प्रजातन्त्र पार्टी (राप्रपा) का प्रमुख सचेतक एवं ज्ञानेन्द्र शाहीले कवितामार्फत व्यंग गर्दै बालकुमारी घटनामा मृत्यु भएकाका परिवारलाई न्याय माग्दैमा कुनै अमुख व्यक्तिले राजीनामा माग्न नपाउने बताउनुभएको छ ।

आइतबार प्रतिनिधि सभाको बैठकमा बोल्दै सांसद शाहीले जनताबाट निर्वाचित भएर आएको सांसदको राजीनामा माग्ने हक कसैलाई नभएको बताउनुभएको हो ।

बालकुमारी घटनाबारे न्याय माग्दा आफ्नो राजीनामा मागिएको भन्दै उहाँले सरकारको विरोध स्वरुप कविता सुनाउनुभएको छ ।

सांसद शाहीले कवितामार्फत भन्नुभयो-

‘फक्रक्क फुल्न नपाउँदै कोपीला मै चुँडाइदियौ
दुई नौजवान युवाको सपना बालकुमारीमै उडाइदियौ
थिए होला तिनीहरूका सपना न्यानो लगाउने र मिठो खाने
रक्षक नै भक्षक भएपछि सम्माननीय सभामुख महोदय, न्याय खोज्न हामी कहाँ जाने ?
आँखाबाट आँशु झार्दै भक्कानिएर रुन्छिन् उनकी आमा
अपराधीलाई कारवाही गर भनी आवाज उठाउँदा माग्छौ मेरो राजीनामा ?
सत्ता तिम्रै छ, शक्ति तिम्रै छ जति दबाउन सक्छौ दबाऊ
दबिएर दबिँदैन यी आवाजहरू एक दिन उठ्नेछन्
र भन्नेछन् भ्रष्टाचारी र देशद्रोहीलाई देशबाटै भगाऊ’