नेपाल सरकारले लकडाउन खुला गर्ने निर्णय गरे संगै सर्वसाधारणले मास्क प्रयोग गर्न छाडेपछि संखुवासभामा उद्योग बाणिज्य संघले ‘आफ्नै लागि माक्स’ अभियान थालेको छ । संखुवासभा उद्योग बाणिज्य संघ र जिल्ला प्रहरी कार्यालय संखुवासभाको संयुक्त आयोजनामा सर्वसाधारणलाई मास्क प्रयोगको बानी बसाउन अभियान थालिएको हो ।

सदरमुकाम खाँदबारीका उद्योगी व्यवसायी र प्रहरीले सचेतना फैलाउने क्रममा शनिबार खाँदबारीमा लाग्ने साप्ताहिक हाटमा मास्क प्रयोग नगर्नेहरूलाई “कोरोना संग बच्न सामाजिक तथा भौतिक दुरी कायम गर्दै नियमित मास्क प्रयोग गर्न आग्रह गरिएको थियो । सो क्रममा स्थानीय ब्यवासायी र प्रहरीहरूले मास्क प्रयोग नगर्नेहरूलाई निःशुल्क मास्क वितरण गरेका छन ।

अभियानको पहिलो दिन खाँदबारी बजारमा दुई हजार भन्दा बढी मास्क वितरण गरिएको संखुवासभा उद्योग बाणिज्य संघका उपाध्यक्ष कृष्ण भगत प्रधानले बताउनुभयो ।

संखुवासभाका प्रहरी नायब उपरीक्षक नवराज मल्लका अनुसार लकडाउन खुले संगै जिल्लामा लापरबाही पनि बढ्दै गएकोले सम्भावित जोखिमलाई ध्यान दिदै ‘आफ्नै लागि माक्स लगाउ’ अभियान सञ्चालन गर्नुपरेको बताउनुभयो । डिसपी मल्लका अनुसार पहिलो चरणमा मास्क प्रयोग नगर्नेलाई सम्झाउने र दोस्रो चरणबाट कारबाही गर्ने योजना रहेको बताउनुभयो ‘आफ्नै लागि माक्स लगाउ’ अभियानलाई खाँदबारी नगरपालिकाले पनि सहयोग गर्ने नगरप्रमुख मुरारीप्रसाद खतिवडाले प्रतिबद्धता जनाउनुभयो ।

सुजन बज्राचार्य खाँदबारी, संखुवासभा –

क्याटेगोरी : समाचार

---

---

---