दैनिक ज्याला गरी खानुपर्ने वर्गको चुलो नबलेपछि वडाले मेस सञ्चालन

साझा पाना २०७७ वैशाख १६ गते १७:११ मा प्रकाशित

ललितपुर महानगरपालिका वडा नं १५ ले सामूहिक मेस सञ्चालन गरेको छ । कोरोना भाइरस सङ्क्रमण फैलने डरले मुलुक बन्दाबन्दी भएको अवस्थामा दैनिक ज्याला गरी खानुपर्ने वर्गको चुलो नबलेपछि वडाले मेस सञ्चालन गर्न थालेको हो ।

वडाध्यक्ष सुदर्शन मिश्रले भन्नुभयो, “हामीले यहाँका दुई स्थान शान्तिनगर टोलमा रहेको अन्डरवल्र्ड किन्डर गार्डेन मन्टेश्वरी र महेन्द्र आदर्श उच्च माध्यमिक विद्यालय प्राङ्गणमा मेस सञ्चालन गरेका छौँ ।

महानगरपालिकाले एक चरणमा राहत वितरणको काम सम्पन्न गरेपछि गरिब र श्रमिकको हितमा बोर्ड बैठकमार्फत मेस सञ्चालन गर्ने अवधारण अघि बढाएको थियो । यसै अवधारणाअनुसार वडा अघि बढेको हो ।”

मेसमा पकाउन आवश्यक खाद्यान्न दाल, चामल, तेल, नुन आदि महानगरपालिकाले व्यवस्था गरिदिएको मिश्रले जानकारी दिनुभयो । वडाले यही वैशाख १२ र १३ गते कामबिना खानै नपाउने व्यक्तिलाई नाम दर्ता गर्न आह्वान गरेको थियो । वडामा ४५० ले नाम टिपाएका थिए । आज लगभग ५०० बढीले खाना खाएका मिश्रले बताउनुभयो । उहाँले भन्नुभयो, “हामीले दिनको दुईपटक उहाँहरुलाई खानाको व्यवस्था गरिदिने भएका छाँै ।

बन्दाबन्दी अवधिभर जे–जस्तो परिस्थिति आए पनि यी नागरिकलाई खाना खुवाउने नै निर्णय भएको छ ।” यदि मुलुकमा कोरोना त्रास बढी पुनः बन्दाबन्दी थप भएमा वडालाई सरकारले दिएको विकास बजेट कटाएरै भए पनि गरिबलाई भोको नराख्ने मिश्रले जानकारी दिनुभयो । वडा नं १५ मा खुमलटार र सातदोवाटो नामक दुई युथ क्लब रहेका छन् ।

यी क्लबमा अवद्ध व्यक्तिहरुले वडालाई मेस सञ्चालनमा निकै सहयोग गरिरहेका छन् भने केही सङ्घसंस्थाले तरकारीका व्यवस्था गरिदिएको मिश्रले जानकारी दिनुभयो । यसैगरी महानगरपालिकाको अन्य २८ वडामा भने धमाधम सामूहिक मेस सञ्चालका लागि तथ्याङ्क सङ्कलन गर्ने कम अघि बढेको प्रवक्ता राजु महर्जनले बताउनुभयो ।

क्याटेगोरी : विशेष
ट्याग : #सामूहिक मेस