काठमाडौँ । नेपाली कांग्रेसमा सहमति खोज्ने प्रयास जारी छ । विशेष महाधिवेशन पक्षधरले अघि सारेका प्रस्तावमाथि सोमबार रातभर छलफल भए पनि ठोस निष्कर्ष निस्कन सकेको छैन । वार्तामा संलग्न नेताहरूले सहमतिको प्रयास अझै जारी रहने बताएका छन् ।

भृकुटीमण्डपमा जारी विशेष महाधिवेशनको तेस्रो दिन आज बन्दसत्रबाट महामन्त्रीहरूको प्रतिवेदनमाथि छलफल तथा पारित, विधान संशोधन, निर्वाचन समिति लगायतका समितिहरू भंग गरी नयाँ गठन र निर्वाचन कार्यक्रम अघि बढाउने कार्यसूची रहेको छ । नयाँ नेतृत्व चयनको तयारी भइरहँदा सहमति भने ‘पावर सेयरिङ’मै अड्किएको छ ।

विशेष महाधिवेशन पक्षधरले आसन्न प्रतिनिधिसभा निर्वाचनमा आफ्नो समूहको सम्मानजनक र न्यायोचित प्रतिनिधित्व सुनिश्चित हुनुपर्ने माग राखेका छन् । संसदीय बोर्ड र निर्वाचनमा कम्तीमा ४० प्रतिशत टिकट सुनिश्चित गर्नुपर्ने उनीहरूको अडान छ । वार्तामा सहभागी एक नेताका अनुसार ४० प्रतिशत प्रतिनिधित्वको अर्थ कम्तीमा ६६ सिट विशेष महाधिवेशन पक्षधरले पाउनुपर्ने हो ।

ती नेताले विशेष महाधिवेशन पक्षधरले अबको निर्वाचनमा कुनै पनि दलसँग चुनावी तालमेल नगर्ने अडान लिएको बताए । तालमेल बिना १६५ वटै निर्वाचन क्षेत्रमा कांग्रेसले उम्मेदवारी दिनुपर्ने र तीमध्ये कम्तीमा ४० प्रतिशत उम्मेदवार विशेष महाधिवेशन पक्षधर हुनुपर्ने माग गरिएको छ ।

विशेष महाधिवेशन पक्षधर नेताहरूले संस्थापन पक्षबाट महाधिवेशन प्रतिनिधिहरूको अपमान भएको भन्दै सहमतिका लागि सम्मानजनक व्यवहार न्यूनतम शर्त भएको बताएका छन् । संसदीय बोर्ड र प्रत्यक्ष निर्वाचन दुवैमा बलियो उपस्थिति आवश्यक रहेको उनीहरूको भनाइ छ ।

एक विशेष पक्षधर केन्द्रीय सदस्यले गगन थापा–विश्वप्रकाश शर्मा समूह र डा. शेखर कोइरालाको समूहलाई अलग रूपमा हेर्नुपर्ने बताए । उनका अनुसार डा. कोइराला अब संस्थापनकै हिस्सा भइसकेकाले उनको व्यवस्थापन संस्थापन पक्षले नै गर्नुपर्ने हो । ‘विशेष महाधिवेशन पक्षधर कांग्रेसभित्रको अलग शक्ति हो भन्ने स्वीकार गर्नुपर्छ,’ उनले भने ।

यसका साथै विशेष महाधिवेशन पक्षधरले विशेष महाधिवेशनको स्वामित्व लिने, महाधिवेशनका निर्णयहरू स्वीकार गर्ने, पार्टी सुधारका लागि महामन्त्रीहरूले अघि सारेका प्रस्तावहरू कार्यान्वयन गर्ने लगायतका मागसमेत अघि सारेका छन् ।

क्याटेगोरी : राजनीति
ट्याग : #breaking, #विशेष महाधिवेशन पक्षधरको दबाब

---

---

---