नेकपा एमालेद्धारा अर्थमन्त्री शर्माको राजीनामा माग

साझापाना २०७९ असार २ गते १४:०४ मा प्रकाशित

काठमाडौँ, २ असार । प्रमुख प्रतिपक्षी दल नेकपा (एमाले)ले अर्थमन्त्री जनार्दन शर्माको राजीनामा माग गरेको छ ।

एमालेले अर्थमन्त्री विवादित बनेको भन्दै राजीनामा माग गरेर बिहीबार प्रतिनिधिसभा बैठक अवरोध गरेको हो ।

एमालेका सांसद भानुभक्त ढकालले विगत ३ दिनदेखि प्रतिनिधि सभाको ध्यानाकर्षण गराइरहेको बताउँदै भने, ‘अर्थमन्त्री बिचौलियाको चंगुलमा परेर करका दरहरू परिवर्तन गरेको र राष्ट्रघात गरेका कारणले राजीनामा दिनुपर्छ ।’

अर्थमन्त्री शर्माले गरेको राष्ट्र बैंकका गभर्नरमाथिको निलम्बन सर्वोच्चले उल्ट्याएपछि नै राजीनामा दिनुपर्ने एमालेको भनाइ छ ।

‘बिचौलियाहरूलाई करका दरहरू परिवर्तन गर्ने र राष्ट्रलाई आघात पार्ने जुन काम भएको छ । यो पछिल्लो गतिविधिबाट सरकारले अर्थमन्त्रीलाई हटाउन सकेको छैन,’ ढकालले भने, ‘हामीलाई के संका लाग्छ भने अर्थमन्त्रीभन्दा माथि पनि यसका जराले धर गरेको छ कि भन्ने ठाउँमा हामी पुगेका छौं ।’

क्याटेगोरी : राजनीति, समाचार
ट्याग : #जनार्दन शर्मा, #नेकपा एमाले