संखुवासभा । प्रतिनिधिसभा सदस्य निर्वाचन २०८२ मा संखुवासभाबाट नेपाली कांग्रेसका उम्मेदवार रहनुभएका दीपनकुमार श्रेष्ठले निर्वाचन परिणामलाई सम्मान गर्दै मतदाता तथा सहयोगीप्रति आभार व्यक्त गर्नुभएको छ ।

श्रेष्ठले सामाजिक सञ्जालमार्फत सन्देश जारी गर्दै निर्वाचन परिणाम जनताको निर्णय भएको उल्लेख गर्दै त्यसलाई पूर्ण सम्मानका साथ स्वीकार गरेको बताउनुभयो । उहाँले प्रत्यक्ष रूपमा विजय हासिल गर्न नसके पनि संखुवासभाली जनताबाट प्राप्त माया, समर्थन र विश्वास आफ्नो लागि ठूलो प्रेरणा बनेको उल्लेख गर्नुभएको छ।

उहाँले लोकतन्त्रमा जीत–हार स्वाभाविक प्रक्रिया भएको बताउँदै आगामी दिनमा पनि संखुवासभा जिल्लाको विकास, समृद्धि र जनताको हकहितका लागि निरन्तर सक्रिय रहने प्रतिबद्धता व्यक्त गर्नुभएको छ ।

श्रेष्ठले निर्वाचनमा नेपाली कांग्रेसको चुनाव चिन्ह ‘रुख’ मा मतदान गर्ने १३ हजार २७१ मतदाताप्रति विशेष धन्यवाद व्यक्त गर्नुभएको छ । साथै निर्वाचन प्रचारप्रसारका क्रममा पार्टीका केन्द्रीय, जिल्ला, प्रदेश, पालिका तथा वडा तहका नेता–कार्यकर्ता, भातृ तथा शुभेच्छुक संघसंस्था, स्वयंसेवक, जनप्रतिनिधि र शुभेच्छुकहरूको सहयोगप्रति पनि कृतज्ञता व्यक्त गर्नुभएको छ ।

निर्वाचन सफलतापूर्वक सम्पन्न गराउन सहयोग गर्ने मतदाता, सुरक्षाकर्मी, कर्मचारी तथा सञ्चारकर्मीप्रति पनि उहाँले धन्यवाद ज्ञापन गर्नुभएको छ ।

 

यसैबीच श्रेष्ठले निर्वाचनमा विजयी हुनुभएका नेकपा (एमाले) का उम्मेदवार डाक्टर अर्जुनकुमार कार्कीलाई बधाई दिँदै सफल कार्यकालको शुभकामना व्यक्त गर्नुभएको छ ।

क्याटेगोरी : समाचार
ट्याग : #दिपन कुमार श्रेष्ठ, #निर्वाचन फागुन २१, #नेपाली कांग्रेस, #संखुवासभा

---

---

---