एक वर्षको अवधिमा मधेश प्रदेशबाट श्रोत नखुलेको करिब दुई करोड रकम बरामद

साझापाना २०७९ साउन ११ गते १५:२४ मा प्रकाशित

जनकपुरधाम । नेपाल प्रहरीले मधेश प्रदेशका विभिन्न जिल्लाबाट एक वर्षको अवधिमा स्रोत नखुलेको १ करोड ९२ लाख ६५ हजार ३ सय २० रुपैयाँ बरामद गरेको छ ।

मधेश प्रदेश प्रहरी कार्यालय जनकपुरधामले आर्थिक वर्ष २०७८÷०७९ मा प्रदेशको विभिन्न जिल्लाको विभिन्न स्थानबाट श्रोत नखुलेको उक्त रकम बरामद गरेको हो ।

एक वर्षमा विभिन्न १४ वटा घटनाबाट उक्त स्रोत नखुलेको रकम बरामद भएको मधेश प्रदेश प्रहरी कार्यालय जनकपुरधामका प्रवक्ता तथा प्रहरी उपरीक्षक तुलबहादुर कार्कीले जानकारी दिनुभयो ।

अवैध वित्तीय कारोबार तथा स्रोत नखुलेको रकम ओसारपसारमा संलग्न ३३ जनालाई प्रहरीले नियन्त्रणमा लिएको पनि प्रहरी उपरीक्षक कार्कीले जानकारी दिनुभयो ।

नियन्त्रणमा लिएका मध्ये आरोप ठहर भएका १७ जनामाथि मुद्दा चलाइएको बरामद रकम विभिन्न भन्सार कार्यालयमा बुझाइएको कार्यालयले जानकारी दिएको छ । ।

नेपाल र भारतको सीमा क्षेत्रमा हुन्डीमार्फत कारोबार हुने गरेकाले स्रोत नखुलेका रुपैयाँ बरामद हुने गरेको प्रवक्ता तथा प्रहरी उपरीक्षक कार्कीले जानकारी दिनुभयो ।

सशस्त्र प्रहरी वा अन्य निकायले बरामद गरेको अवैध रकम भने यसमा समावेश गरिएको छैन ।

प्रहरी उपरीक्षक काकीले उनीहरूले आफ्नै प्रतिवेदन तयारी गर्ने गरेकाले यसमा समावेश नगरिएको जानकारी दिनुभयो ।

क्याटेगोरी : अपराध/सुरक्षा, समाचार
ट्याग : #hot, #दुई करोड रकम बरामद