प्रेस युनियनको सचिवमा लक्ष्मीराज भण्डारीको उम्मेदवारी घोषणा

साझापाना २०७९ साउन ४ गते १०:१५ मा प्रकाशित

काठमाडौँ । नेपाल प्रेस युनियनको आसन्न नवौँ महाधिवेशनमा केन्द्रीय सचिव पदमा लक्ष्मीराज भण्डारीले उम्मेदवारी घोषणा गर्नुभएको छ ।

युनियनको महाधिवेशन अगामी साउन ६ र ७ बागमती प्रदेश राजधानी हेटौँडामा आयोजना हुँदैछ । उहाँ प्रेस युनियनमा लामो समयदेखि सक्रिय हुनुहुन्छ । नेपालको राष्ट्रिय टेलिभिजन तथा रेडियोहरुमा दुई दशकभन्दा लामो समयदेखि क्रियाशिल भण्डारीले जबरजस्त उम्मेदवारी घोषणा गरेका हुन् ।

पत्रकारको पेसागत सुरक्षा र श्रमको मूल्य, पेशागत दक्षता, सीप, विकास र क्षमता अभिवृद्धि, मर्यादित र व्यावसायिक पत्रकारिताको प्रवद्र्धन, मिडिया मैत्री कानुन निर्माणका लागि भण्डारी निरन्तर पैरवीमा क्रियाशिल छन् । आफू सधैँ श्रमजीवी पत्रकारका साथमा रहेको उल्लेख गर्दै उहाँले यसका लागि कसैसँग सम्झौता नगर्ने स्पष्ट पार्नुभयो ।

उहाँले यसअघि नेपाली कांग्रेस ‘बिट’मा काम गरिरहेको क्रियाशील पत्रकार, विभिन्न सञ्चारमाध्यममा प्रस्तोता, उत्पादक तथा व्यवस्थापकको रुपमा जिम्मेवारी पुरा गर्दै आउनुभएको छ ।

आसन्न महाधिवेशनका लागि अनिता विन्दु पक्षको उम्मेदवारी घोषणा भइसकेको छ भने सस्थापन इतर पक्षबाट शिव लम्साल उम्मेदवार बन्ने लगभग निश्चित भएको छ । भण्डारीले कुन समूहबाट सचिव पदमा उम्मेदवारी दिने भन्ने खुलाएका छैनन् ।

क्याटेगोरी : समाचार
ट्याग : #लक्ष्मीराज भण्डारी