लण्डनमा होटलको अनुभवबाट स्थापित दियालो :अध्यक्ष चापागाँई

तारकेश्वर शेषमतिमा चर्चित दियालो फुडल्याण्डको शाखा विस्तार

साझा पाना २०७८ मंसीर ६ गते ०८:१३ मा प्रकाशित

काठमाडौं ५ मङ्सिर । काठमाडौँको चर्चित होटल दियालो फुडल्याण्ड वसुन्धाराले आफ्नो चौथो शाखा काठमाडौकै तारकेश्वर नगरपालिका शेषमति पुल नजिकै विस्तार गरेको छ ।

सभा समारोह, विभिन्न चाडपर्व र विवाह व्रतवन्धसहितका कार्यक्रम गर्न मिल्ने रेष्टुरेण्ट र क्याटरिङको समेत सुविधा उपलब्ध हुने गरी सो शाखा विस्तार गरिएको दियालो फुडल्याण्डका संस्थापक अध्यक्ष जनप्रकाश चापागाईले बताउनुभयो । सो शाखाको शनिबार पूर्व रक्षामन्त्रीसमेत रहनुभएका सांसद भीमसेनदास प्रधान र कांग्रेस नेता सुरेन्द्र पाण्डेले संयुक्त रुपमा उदघाटन गर्नुभयो ।

नुवाकोट जाने माछापोखरी वाईपासबाट करिव ६०० मिटर टाढा अवस्थित सो दियालो फुडल्याण्ड कोभिड अगाडिनै खोल्ने गरी काम अघि बढाइएकोमा महामारीले गर्दा अहिले शुरु गरिएको हो । सो दियालो फुडल्याण्डका संस्थापक अध्यक्ष चापागाइले दश वर्ष बेलायतमा काम गरेपछि यहाँ आएर दियालो र अनुपम फुडल्याण्डको नाममा उक्त समूहको होटल बिस्तार गरिरहनुभएको छ ।

पन्ध्र वर्षअघि काठमाडौँको वसुन्धरामा उहाँको नेतृत्वको समूहको पहिलो होटल दियालो फुडल्याण्ड सुरु गरेको हो । सोही नाममा वुटवलमा, भरतपुरमा र बालाजुमा पनि सञ्चालनमा रहेको छ ।

त्यसैगरी अनुपम फुडल्याण्ड काठमाडौँको बत्तीसपुतलीमा सञ्चालनमा छ । अनुपमलाई पोखरा, हेटौँडा र नुवाकोटमा शाखा बिस्तार गर्ने तयारी छ । पाँच वर्षमा २० स्थानमा शाखा खोल्ने तयारी छ ।

कानूनमा प्रमाणपत्र तह पास गरेर नौ वर्ष आठ महिनाको लण्डन बसाइँमा होटलको सेफको काम गरेर आएपछि चापागाइले काठमाडौँमा माधव पाण्डेसँग मिलेर दियालो फुडल्याण्ड सुरु गर्नुभयो । साझेदार र व्यवसाय बढ्दै गयो ।

सुरुमा दुई जनाले रु दुई करोड २० लाख लगानीबाट थालिएको यो व्यापार आजसम्म आईपुग्दा रु ५० करोड नाघेको छ । साझेदार २७ जना पुगेका छन् । मुख्य समूहमा चापागाईसहित पाँच जना छन् भने शाखामा स्थानीय साझेदार ३० प्रतिशत राख्ने गरिएको छ ।

चितवनमा यो समूहले सबैभन्दा ठूलो सभाहलसहितको दियालो फुडल्याण्ड सञ्चालनमा ल्याएको छ । उहाँको दाबी छ सबैकोभन्दा मीठो खाना हामी खुवाउन सक्छौँ ।

क्याटेगोरी : समाचार
ट्याग : #जनप्रकाश चापागाई