लुम्बिनीमा मन्त्री बनेका ४ सांसदलाई फिर्ता हुन जसपाको निर्देशन

साझापाना २०७८ वैशाख ७ गते १०:५७ मा प्रकाशित

काठमाडौँ, ६ वैशाख । लुम्बिनी प्रदेशमा नयाँ मन्त्री नियुक्त भएका जनता समाजवादी पार्टी (जसपा) पार्टीका सांसदलाई सरकारबाट फिर्ता हुन पार्टीले निर्देशन दिएको छ ।

सोमबार एक विज्ञप्ति जारी गर्दै जसपाले निर्णय विपरीत लुम्बिनी प्रदेशमा मन्त्री पदको सपथ लिएको भन्दै ४ सांसदलाई २४ घण्टे स्पष्टीकरण सोधेको हो ।

जसपाको लुम्बिनी प्रदेश समितिका अध्यक्ष अशोककुमार यादवले जारी गरेको विज्ञप्तिमा नवनियुक्त मन्त्रीहरु विजयबहादुर यादव, सन्तोष पाण्डे, सुमन शर्मा रायमाझी र कल्पना पाण्डे लम्साललाई यथाशिघ्र सरकारबाट फिर्ता हुन निर्देशन दिँदै स्पष्टीकरण माग गरेका हुन् ।

चित्तबुझ्दो स्पष्टिकरण नभए पार्टीबाटै निष्काशन गरिने उल्लेख गरिएको छ ।

यता, जसपा नेपालका अध्यक्ष महन्थ ठाकुर पक्षका नेताहरुले जसपा नेपालका नव नियुक्त मन्त्रीहरुलाई बधाई तथा कार्यकालको शुभकामना दिइरहेका छन् ।

यसरी हेर्दा जसपाको एउटा पक्षले प्रधानमन्त्री केपी ओलीसँगै सहकार्य गरेर अघि बढ्ने आकांक्षा राखेको बुझिन्छ ।

क्याटेगोरी : समाचार
ट्याग : #breaking, #लुम्बिनीमा मन्त्री बनेका ४ सांसद