काठमाडौं । नेपाल आयल निगमले बबरमहलमा केन्द्रीय कार्यालयको नयाँ भवन बनाउने भएको छ । २०७२ वैशाखको भूकम्पले कार्यालय चर्काएपछि निगमले सोही स्थानमा कार्यालयको नयाँ भवन बनाउन लागेको हो ।

भूकम्पका कारण भवन पूर्ण क्षति भएकाले केन्द्रिय कार्यालय रहेको तीनवटै भवनमा सरकारले रातो स्टिकर टाँसेको थियो । लामो समयको गृहकार्यपछि निगमले बबरमहलमा रहेको तीन पुराना भवन भत्काएर सोही स्थानमा दश तलाको नयाँ कर्पोरेट भवन बनाउन बोलपत्र आह्वान गरेको निगमले बताएको छ । नेपालकै आधुनिक र सुविधासम्पन्न भवनमध्येमा सूचीकृत हुने गरी नयाँ भवन बनाउन लागिएको निगमका प्रवक्ता विनितमणि उपाध्यायले जानकारी दिए । प्रवक्ता उपाध्यायका अनुसार नयाँ बन्ने कार्यालय भवनको डिजाइन भूमिगत दुई तलाको पार्किङ हुने र जमीनमाथि १० तलाको भवन बनाइने गरि संरचनाको खाका तयार पारिएको छ ।

जमीनमाथिको १० तलामध्ये चार तलाको आधुनिक भवन बन्ने र छ तलाको टावर बन्ने बताइएको छ । नयाँ बन्ने कार्यालय भवनको कोठा,भवनमा लिफ्ट, फायरफाइटिङ, आकस्मिक निकासलगायत सबै अन्तरराष्ट्रिय मापदण्डअनुसार रहने निगमले जनाएको छ । तीन वर्षभित्र निर्माण सम्पन्न गरिने भवन बनाउन रु एक अर्ब ७९ करोड लागत अनुमान गरिएको छ । हालको पुरानो कार्यालय भवन भत्काउन शुरु भएपछि निगमको अस्थायी कार्यालय टेकु कार्यालयमा रहने निगमले बताएको. छ ।

क्याटेगोरी : समाचार
ट्याग : ###नयाँ भवन बनाउँदै, ##नेपाल आयल, #breaking

---

---

---