तारकेश्वर नगरपालिका वडा नं। ८ को वडा कार्यालय मनमैजुको डाँडागाउँमा आज जेष्ठ नागरिकलाई न्यानो कपडा वितरण गरिएको छ ।

वडा नं। ८ का अध्यक्ष मनोज कुमार घिमिरेको सभापतित्वमा भएको न्यानो कपडा वितरण कार्यक्रमको प्रमुख अतिथिमा नगर प्रमुख रामेश्वर बोहोरा, विशेष अतिथि उपप्रमुख भवानी डोटेल धिताल, प्रमुख प्रशासकिय अधिकृत शिव लम्सालको हातबाट ७० वर्ष भन्दा माथिका भत्ता कार्ड भएका जेष्ठ ८७ जना नागरिकलाई न्यानो कपडा वितरण गरिएको छ ।

नगर महिला बालबालिका तथा समाज कल्याण साखाले तारकेश्वरका सबै वडाहरुमा जेष्ठ नागरिकहरुलाई कपडा वितरण कार्य गर्दै आइरहेको महिला बालबालिका साखा प्रमुख प्रतिमा मिश्रले बताउनुभयो ।

कार्यक्रममा महिला बालबालिका तथा समाज कल्याण साखा प्रमुख प्रतिमा मिश्रले स्वागत मन्तव्य राख्नुभएको थियो । त्यस्तै नगर स्वास्थ्य साखा प्रमुख बिनोद शाहले पनि मन्तव्य राखेका थिए । कार्यक्रममा वडा नं। ८ का जनप्रतिनिधिहरुको उपस्थिति रहेको थियो ।

कार्यक्रममा बोल्दै नगर प्रमुख रामेश्वर बोहोराले तारकेश्वर नगरपालिका भित्रका जेष्ठ नागरिक र एकल महिलाहरुका लागि स्वास्थ्यमा विशेष कार्यक्रम छिट्टै सञ्चालन गर्न नगरपालिका लागिरहेको बताएका थिए । त्यस्तै तारकेश्वर १ साङ्लामा डाइलासिस सेन्टरको मेसिन किन्ने कार्य अगाडी बढेकाले छिट्टै काम सुरु हुने बताउनुभयो ।

तारकेश्वर नगरपालिका नगर स्वास्थ्य शाखाको आयोजनामा जेष्ठ नागरिकहरुको लागि निःशुल्क आँखा शिविर तथा प्रयोगशाला परीक्षण कार्यक्रम सम्पन्न भएको हो। तिलगंगा आँखा अस्पताल र नेपाल आँखा अस्पतालको सहयोगमा विशेषज्ञहरुबाट आँखा परिक्षण गरिएको थियो । चस्मा आवश्यक पर्नेहरुका लागि चस्मा वितरण समेत गरिएको छ । स्वास्थ्य साखाले सुगर र ब्लड प्रेसरको परिक्षण समेत गरेका थिए ।

कार्यक्रमबाट ८७ जना जेष्ठ नागरिकले न्यानो कपडा पाएका छन् । न्यानो कपडा लिन छुटेकाहरुलाई वडा कार्यालयले पछि वितरण गर्ने वडा अध्यक्ष मनोज कुमार घिमिरेले बताउनुभएको छ । घिमिरेकाअनुसार तारकेश्वर नगरपालिका वडा नंं। ८ भित्र स्थायी वा अस्थायी रूपमा बसोबास गरेका सबैले अबदेखि निःशुल्क ल्याव सेवा पाउने भएका छन् ।

क्याटेगोरी : समाचार
ट्याग : #तारकेश्वर ८

---

---

---