खाँदबारीका नब्बे बर्षिया सितादेवीद्वारा बिपन्न परिवारलाई चामल प्रदान

साझापाना २०७७ असार २६ गते १९:०४ मा प्रकाशित

कोभिड १९ का कारण समस्यामा परेका बिपन्न परिवारलाई राहत उपलब्ध गराउनका लागि खाँदबारी १ का सीतादेवी बज्राचार्य र वहाँका परिवारले १० बोरा चामल उपलब्ध गराउनुभएको छ ।

यो महामारीको घडिमा समस्यामा परेका परिवारका लागि आफ्नो परिवारका तर्फबाट १० बोरा चामल उपलब्ध गराएर सामाजिक दायित्व पुरा गरेको ९० बर्षिया सीतादेवी बज्राचार्यले बताउनु भयो । वहाँले सवैले यो समयमा अप्ठेरो अवस्थामा रहेका बिपन्न परिवारलाई सहयोग गर्न सकिए महामारिको अवस्थालाई टार्न ठुलो राहत पुग्ने धारणा राख्नुभयो ।

राहत सामग्री हस्तान्तरण कार्यक्रमलाई सम्बोधन गर्दै वडाध्यक्ष निरन्जन श्रेष्ठले सितादेवी बज्राचार्यको परिवारलाई धन्यबाद प्रकट गरेका थिए । अध्यक्ष श्रेष्ठले राहत स्वरुप प्राप्त १० बोरा चामल चाँडैनै बिपन्न परिवारलाई बितरण गरिने बताउनु भएको थियो ।

लामो समय देखिको लकडाउनका कारण जनजिवन अस्तब्यस्त बनेपछि शुरु गरिएको राहत बितरण अहिले ठप्प हुँदा बिपन्न परिवार थप समस्यामा पर्न थालेका छन् । बिश्वभर नै आतंङ्क मच्चाईरहेको कोरोना भाईरसको प्रकोपले पछिल्लो दिन झन बिकराल रुप लिन थालेपछि अहिले देशका ७७ जिल्ला प्रसासनले थप कडाई शुरु गरेको छ । माक्स नलगाई जथाभावी हिँडडुल गर्नेलाई पक्राउ गर्ने, जरिवाना तिराउने कार्य शूरु गरिएको जनाईएको छ ।

क्याटेगोरी : समाचार